South Korea ka enkawl thei hi ka lawm - Klinsmann

Germany leh United States manager hlui Jurgen Klinsmann chuan South Korea head coach hna a chelh dawn. Kum 58 mi Klinsmann hian kum thum leh a chanve atan contract a ziak a ni.

South Korea-in March 24 hian Ulsan-ah Colombia nen friendly match an khel dawn a, Klinsmann hnuaia an match hmasa ber tur a ni ang. German coach Klinsmann chuan, "South Korea ka enkawl thei hi ka lawm a, coach ropui Guus Hiddink aṭanga Paulo Bento te thlengin an hnung ka zui thei dawn a ni," tiin a sawi.

Klinsmann hian a inkhelh hun laiin Germany ta match 108-ah goal 47 a khung a, 1990 World Cup-ah an ram a champion pui bawk. Coach a nih hnuah Klinsmann hian Germany chu 2006 World Cup-ah pathumna a nihpui a, CONCACAF Gold Cup-ah United States a champion pui bawk.

German coach hian Qatar-a World Cup neih zawh taka South Korea last 16 thlenpuitu Paulo Bento a thlak ang. Klinsmann-a contract-ah hian Canada, Mexico leh United States ten an thlen tur 2026 World Cup pawh a tel pha a, a hruai thleng ang em tih chu hunin a hril ang.