Ighalo-a'n goal li a khung

Nigeria striker Odion Ighalo chuan Asian football-ah a hming a chher chhunzawm zel a, AFC Champions League 2022 semifinal-ah goal li a khung - Ighalo khelhna Al-Hilal chuan 7-0 in Al Duhail an hneh a ni.

Saudi club Al Hilal tan hian Ighalo bakah Porto striker hlui Moussa Marega chuan goal hnih khungin, Salem Aldawsari chuan goal khat a thawh ve bawk.

Asian football-a club inelna sang ber AFC Champions League final hi double leg-a khelh tur a ni a, Al Hilal leh Japanese club ṭha Urawa Reds Diamonds te an intawng ang.

AFC Champions League final match hmasa zawk hi April 29-ah khelh tur niin, Al-Hilal khelmualah an intawng ang a, May 6-ah second leg chu Saitama, Japan-ah khelh a ni thung dawn a ni.

Al-Hilal hi champion lai niin, kum 2005-a Saudi club tho Al-Ittihad hnua AFC Champions League-a a zawna champion thei hmasa ber nih an tum mek - vawi li an champion tawh a, champion ngun ber record an chelh mek chu belhchhah an tum dawn.

Saudi league lamah erawh Al-Hilal hi table-ah palina an ni mek a, Cristiano Ronaldo khelhna Al-Nassr chuan hma hruai mekin, point 11-in an phak lo mek; match thumin an khel tlem thung.

Asia khawmualpuia club inelna sang ber, AFC Champions League 2022 hi March 8-15 inkar khan qualifier khelh niin, April 2022 khan group stage khelh ṭan a ni a, May-ah 2022 champion a hriat ve dawn chauh.

Season tharah erawh AFC Champions League kalphung hi thlak tawh tur niin, August, 2023 chhungin qualifier khelh zawh a ni ang a, September - May, 2024 chhungin inelna pangngai chu khelh zawh tur a ni ang.