Copa del Rey: Semifinal hmasa zawk zaninah khel dawn

Spanish football-a inelna ngaihhlut hlawh Copa del Rey semifinal hmasa zawk chu zanin dar 1:30 hian khelh a ni dawn a, Osasuna-in Athletic Bilbao an mikhual dawn.

Copa del Rey semifinal lehlamah Real Madrid leh Barcelona an inkhelh dawn avangin Osasuna leh Bilbao inkhel tur hian ngaihven a hlawh tawk lo a, mahse, Spanish football-a club ropui pahnih hi an inkhelh hun tur erawh Ningani zanah a ni.

Thil mak danglam ve tak a awm - Spanish Cup semifinal khel tur Barcelona, Real Madrid leh Bilbao te hi Spanish football-ah chuan hming langsar an ni reng a, hriat an hlawh hle.

Tun season Copa del Rey semifinal khel tur zinga hriat hlawh lo ber chu Osasuna an ni a, mahse, he team hi Spanish Cup semifinal khel tur zinga kar hmasa La Liga inkhela chak awmchhun an ni!

Osasuna bihchianna

Semifinal khel tur club dang angin Osasuna hian hriat hlawh tawk lo mah se, zuam ngawt chi an ni lo - La Liga table-ah pariatna an ni mek a, an hnuai chiaha awm chu Athletic Bilbao an ni.

Osasuna hian first round aṭangin Copa del Rey hi an khel a, Sixth division club CD Fuentes (4-1), fourth division club CD Arnedo (3-1) leh third division club Gimnàstic (2-1) te hnehin round of 16 an lut a, last 16 aṭang hian a harsa ṭan.

Round of 16-ah hian season duhawm tak hmangtu Real Betis chu 2-2 a an inhnehtawkpui hnuah penalty hmangin an hneh a, quarterfinal-ah Sevilla chu minute 120 chhungin 2-1 in an hneh bawk.

Osasuna hian semifinal hmaa an league match tawp berah Sevilla hi 3-2 in an hneh nawn a, Copa del Rey aṭanga an petchhuah chu an tihpalh a ni lo tih an pholang - Bilbao hneh turin he team hi an ṭha tawk.

Bilbao ve thung

Barcelona boss hlui Ernesto Valverde kaihhruaina hnuaiah Bilbao-in hming chher tumin theihtawp an chhuah a, Spanish Cup semifinal hial an thleng. Mahse, an league match hnuhnung pahnihah an tlawm ve ve a, Atletico Madrid (1-0) leh Girona (3-2) an ngam lo.

Bilbao hian Spanish Cup hi first round aṭanga khel ṭanin, fourth division club UD Alzira (2-0), fourth division club tho Sestao River Club (1-0) leh third division club CD Eldense (6-1) te hneh chhoin, awlsam takin last 16 an inpetkai.

Round of 16-ah hian anmahni ang thoa La Liga club Espanyol chu 1-0 in an hneh a, team ṭha Valencia chu quarterfinal-ah 3-1 a hneh zuiin, semifinal an lut chiang hle.

Kum 1984 hnua a vawi khat nan Copa del Rey champion nih an tum dawn a, mahse, Osasuna-in season an hman pangngaizia kan sawi tawh a, Bilbao tan a awlsam bik ngawt lo ang.

Buaina langsar

Bilbao-in semifinal luh châk viau mah se thapui thawha an beih a ngai dawn - hliam vangin goalkeeper chhuanvawr Unai Simon inlan theih dawn leh dawn loh a chiang lo a, player chhuanvawt Nico Williams (khup hliam) dinhmun a la chiang lo bawk.

Player langsar zingah Ander Herrera (malpui) leh Inigo Martinez (ke phah) chu hliam vanga chawl sa an ni a, Bilbao tan hnehna chang turin Inaki Williams leh Spanish forward Alex Berenguer ten an theihna tak tak an pholan a ṭul ang.

Osasuna hi an ṭhat dan berin an inlan thei dawn bik lo. Full-back Ruben Pena chu inlan thei lo tur chiang sa a ni a, Ruben Garcia dinhmun a chiang lo bawk.

Kum 28 mi attacking midfielder Moi Gomez mawhphurhna a sang leh dawn a, Morocco international Abde Ezzalzouli leh tun season-a goal riat khung tawh Ezequiel Avila te an chet ṭhat a ṭul bawk ang.