Vawiinah India Vs AustraliaVawiinah India Vs Australia

India leh Australia chuan vawiin chawhma dar 9:30 aṭangin Test match vawi li an khelh tura vawi thumna an khel dawn. Men in Blue hian match hmasa pahniha hnehna an chan tawh avangin Border–Gavaskar Trophy an kawl chhunzawm dawn a, tun ṭuma an chak leh chuan series an la ang.

Rohit Sharma hote hian match hmasa pahnihah chiang takin chak mah se KL Rahul a che ṭha tawk lo. Rahul hian first Test-ah 20 runs chauh a siam a, second Test-ah 17 leh run khat chauh a siam. Rahul hi vice captain nihna hlihsak a ni a, third Test-a tel lo tura ngaitu an ṭhahnem hle.

Thla 12 chhugin Rahul hian 13.37 chauh a average pha a, innings hnuhnung 10-ah 30 runs vuak tlin a nei lo. India opener ni mah se Rahul hian bowler R Ashwin (37.00) leh Mohammad Shami (21.80) te average a pha lo tihna a ni.

Rohit chuan, "Vice captain a ni emaw ni lo emaw a danglamna a awm lo. Theihna nei player chuan a theihna lantirna hun ṭha pek a ni ang," tiin Rahul a chhan. Chutihrualin Rahul hi Shubman Gill-a'n opener turin a thlak a rinawm a, vawiina an inkhelh hunah engkim a chiang ang.