Number 1 ni rei ber Djokovic

Novak Djokovic chuan Steffi Graf khumin, tennis player piang tawh zinga world number 1 ni rei thei ber dinhmun a chelh ta.

Serbian star Djokovic hian January thla khan a vawi 10 nan Australian Open nomawi a chawi a, ranking siam ṭha zuiin a chung berah a awm, tunah chuan chawlhkar 378 chhung teh meuh number 1 a ni ta a ni.

Grand Slam vawi 22 champion tawh Novak hian mipa ranking bikah chuan, kum 2021 March thla khan number 1 ni rei thei ber dinhmun a lo chelh daih tawh, tunah chuan hmeichhe lama record nei ṭha ber pawh a khum fai vek.

Kum 35 mi Djokovic chuan, "Sawi ngaihna pawh ka hre lo, ka sulhnu ka chhuangin ka lawm takzet. Tennis player ropui bik Graf-i record khum meuh chu ka tan a hlu," tiin a sawi.

German legend Graf khan kum 1987 leh 1999 inkar khan major title 22 a la. Kum 1987 khan a vawi khat nan world number 1 a ni a, a zawnin chawlhkar 186 chhung a chungnung ber dinhmun hi a luah bawk a ni.

Djokovic kawng hi a awlsam vek bik lo. Covid-19 vaccine a lak duh loh vangin tournament ṭhenkhat a khel thei lo a, ranking lamah pawh a tlahniam hman hle. Thla ruk a liam hnuah January thla tawp khan number 1 dinhmun hi a luah ve leh chauh.

A kawng a awlsam loh rual hian vanneihna a nei ve bawk. Season hmasa khan Carlos Alcaraz chuan US Open nomawi a chawi a, number 1 a ni bawk. Mahse, hliam vangin Spanish rawlthar hi a inkhel zui thei lo, thla li hnuah tun hnai khan a lo kir ve leh chauh - Alcaraz hi hliam loin khel thei reng ni se chuan Novak tan number 1 nih leh a harsa ang.

A zawna number 1 nih rei kawngah erawh Djokovic hian tluk loh a nei. Chawlhkar 122 chu a ni zawn thei a, mahse a chungah hian - Roger Federer (237 weeks), Jimmy Connors (160) leh Ivan Lendl (157) te an awm.

Kum 2021 khan a vawi sarih nan number 1 ni chungin kum tawp a lo hmang tawh a, kuminah hian number 1 ni chunga season khar leh tur chuan a thawhrim a ngai dawn hle.