Punjab kawng sialtu Aizawl FC

Aizawl FC-in player 10-a khel chungin I League champion tum Sreenidi Deccan chu 1-1 in an chelh a, Hyderabad club-in point hnih an hloh avangin champion kawng a bumboh sawt.

Mizo club zarah RoundGlass Punjab-in 'pressure' an neih tlem phah a, zanin dar 7:00-a Churchill Brothers an hneh a nih phei chuan point ngain an sang fal tawh ang.

An inhnehtawk

Nimin tlai RG Stadium-a inkhelah Aizawl FC keeper Lalmuansanga chu minute 74-naah hnawhchhuah a ni a, Sreenidi Deccan-in an tamna hmang ṭangkaiin Rilwan Hassan hmangin minute 80-naah hma an hruai nghal.

Mizo club an beidawng duh lo a, January thlaa an lakluh Ivan Veras chuan R. Lalthanmawia cross chu minute 84-naah a tauh lut. Goal a luh belh tawh lo a, 1-1 in inkhel a tawp.

Vanduaina

Season tawp lamah Sreenidi Deccan-in hma an hruai a, amaherawhchu Mohammedan SC laka 6-4 a an chak loh avangin pahnihnaah an tla thla.

Hyderabad club hi head to head-ah RoundGlass Punjab aia an ṭhat zawk avangin champion turin beiseina sang tak an la nei tho a, beiseina chhi nung turin Mizo club an hneh ngei a ṭul.

Sreenidi tan Lalromawia'n bul a ṭan a, RG Stadium-ah point thum hlawhchhuah tum mah se an beisei ang ngawtin a awlsam lo. Second half-ah Ramhlunchhunga rawn lut ve bawkin an goal bawh a na lehzual a, AFC keeper Lalmuansanga'n box pawnah ball a ben thlak avangin minute 74-naah hnawhchhuah a ni.

Player 10-a khel Mizo club tlarhnung a pawp a, box chhung ball awm an petchhuah mai theih loh avangin Rilwan Hassan-a'n a tauh goal. Hyderabad club-in chakna goal-ah ngai mah se Veraz hmangin minute li hnuah Mizo club-in an sut.

Mikhual team hian Ogana Louis hmangin hma an hruai nawnah an ngai a, assistant referee-in offside flag a phar. Sreenidi-in point hnih hlu tak an hloh a; Romawia, Chhunga leh Vanlalbiaa Chhangte ten I League nomawi an chawi theih a rinawm ta lo zawk.

Punjab-ah Mizo

RoundGlass Punjab-in an match hnuhnung berah Sudeva Delhi 8-0 ngawtin an sawp a, Churchill Brothers hmachhawn turin an inpeih hle.

Punjab club hian Mizo player an ngah a; Sudeva lakah pawh hian Hmingthanmawia, Brandon VL Remdika leh F. Lallawmawma ten bul an ṭan. Bench-ah Daniel Lalhlimpuia leh Samuel Lalmuanpuia te an la awm.

Punjab hi match thum khelh hmabakah vawi hnih an chak a nih chuan an champion dawn a, season tharah Indian Super League an khel thei dawn. Sreenidi beiseina titlem turin zanina Churchill an hneh hi a pawimawh hle.