League Cup hi a bul ṭanna chauh a nih ka beisei - Shaw

Manchester United-in Pathianni zan khan Wembley Stadium-ah Newcastle United hnehin League Cup nomawi an chawi a, Luke Shaw chuan, "League Cup hi a bul ṭanna chauh a nih ka beisei." tiin nomawi dang chawi theih a la inbeisei thu a sawi chhuak.

Zanin dar 1:15 hian Erik Ten Hag-a hoten FA cup fifth round-ah West Ham United an mikhual dawn a, an phur vanglai tak ni mah se Hammers an hneh lo a nih chuan nomawi dang pathum an la beisei zinga pakhat beiseina a tawp nghal dawn tihna a ni.

Man United hi kartawp hian an hmelma Liverpool khelmual Anfield-ah an lenglut dawn a, League Cup final an khelh zawh chauh bawk avangin Ten Hag-a'n squad a siksawi hret a rinawm. Christian Eriksen (ke rek) leh Donny van de Beek (khup) te chu hliam vangin an la khel thei lo hrim hrim a, Anthony Martial dinhmun a la chiang lo bawk.

Dutch manager Ten Hag hian David de Gea hahdamtir a duh a nih chuan Tom Heaton leh Jack Butland te pahnihah duh thlan tur a nei dawn. League Cup final-ah Harry Maguire, Victor Lindelof, Aaron Wan-Bissaka leh Tyrell Malacia ten bul an ṭan pha lo vek a, tlarhnungah duh thlan tur ṭhahnem tak an awm tihna a ni.

Midfield-ah Marcel Sabitzer leh Scott McTominay te bul ṭantir theih an ni a, goal nawr tur pawhin Alejandro Garnacho leh Jadon Sancho te an awm. Man United squad chhahzia a lang a, chutihrualin Ten Hag erawhin a thlak hlawk a rinawm loh.

Man United hian nikum October thla khan West Ham hi Marcus Rashford goal hmangin an hneh hram. An intumna hi a rei deuh tawh avangin Man United hi nasa takin hma an sawn leh tawh a, FIFA World Cup zawhah hma an sawn lehzual a, zaninah pawh rinkai zawk an ni ngei ang.

West Ham pawhin an match hnuhnungah Nottingham Forest 4-0 ngawtin an sawp a, an phur lai tak tih ve theih tho an ni. David Moyes hote hi tun season-ah che ṭha tawk loin league-ah 16-na chauh ni mah se English midfielder ṭha ber zinga mi Declan Rice kawltu an ni a, season liam ta khan pasarihna ni chungin season an khar. Moyes hian a hlawhchhamna hmuna hlawhtlinna kawng zawh mek Ten Hag-a hote hneh hi a châk khawp ang.