Saints tan quarterfinal a beiseiawm

Southampton-in an manager Nathan Jones an ban a, Rubén Sellés-a'n season tawp thleng a enkawl dawn. Saints-in Sellés hnuaia an match hmasa berah Chelsea an hneh lo a, match hnuhnung berah Leeds United an hneh lo thung. Premier League table thlir chuan Saints hi table mawngphahah an awm a, FA Cup hi rilru hahna chhawk zângkhaitu a ni thei ang.

Zanin dar 12:45 hian Saints-in Grimbsy Town an mikhual dawn a, an khingpui tur hi League Two club chauh an nih avangin quarterfinal thlen theihna kawng a inhawng zau hle. Selles hian Saints hi season tawp thleng a enkawl dawn a, Premier League-a a inhamtanpui bakah FA Cup-ah round sang zawk an thleng a nih bawk chuan English club hi a enkawl chhunzawm theih ngei a rinawm.

Kum 39 mi Selles hi Valencia-ah a piang a, Valencia U18 team a enkawl tawh. England a pan hma hian Greece, Russia, Azerbaijan leh Denmark-ah te hna a thawk tawh a, kum 25 mi a nihin UEFA pro licence hi a nei. Saints-in Ralph Hasenhüttl an ban khan match khat chhung club a enkawl a, League Cup-ah Sheffield Wednesday an hneh. English club hian season an hmang ṭha lo a, chutihrualin Spanish manager Selles tan coaching career sang zawk thlen nan tun hi hun ṭha a ni.