United-in City an elpha thei - Pep

Pep Guardiola chuan Manchester United chu sum an hman leh hret chuan Premier League-a Manchester City elpui zinga mi an nih theih thu a sawi.

Man City boss Pep chuan, "Carabao Cup an champion avangin United ka lawmpui. Newcastle pawhin hna ṭha tak an thawk a, final hmuhnawm tak an chhawp chhuak a ni. Engtik niah emaw kan elpui zinga mi an ni dawn. An rawn tel a nih chuan lawm takin kan lo pawm ang," tiin Premier League boruak a san sawt tur thu a sawi.

Man United chungchang sawi chhunzawmin Pep chuan, "Sum an hmang hnem leh hret a nih chuan nomawi chawi thei zinga mi an ni ang. Sum an hman tam loh vanga tun hnaia che ṭha lo a ni lo em ni?" tiin ṭawngkam mei nei tak a chhak chhuak.

City hi financial fair play bawhchhiaa puh an ni a, chutihrualin United hian league nomawi an chawi hnuhnun ber kum 2013 aṭangin pound tluklehdingawn khat an hmang leh tawh. Red Devils hian FFP bawhchhe lo mah se sum an hmang tam ve tho tih erawh a chiang.

Pep chuan, "England ka rawn awm tirh aṭangin United hi chu elpui tur zinga awm ziah turah ka ngai a, thil danglam vakah ka ngai lo. Hun kan tawn thlirkir chuan kan chungnung zawk a, tun hnaiah erawh min rawn hnaih hle. Erik hian hna ṭha tak a thawk a, Premier League-ah hian engpawh a thleng thei a ni," tiin a sawi.

City hian nizan khan FA Cup fifth round-ah Bristol City an hmachhawn a, result kan hre hman lo.