Tennis chawlh hun an pawtsei

Association of Tennis Professionals (ATP) leh Women's Tennis Association (WTA) chuan Covid-19 vanga inelna an neih loh hun tur an pawtsei a, August thla hma chuan tournament khelh theih a ni dawn lo.

Mipa leh hmeichhe tennis thuneitu sang hian March thlatir lam aṭang khan inelna neih ho an titawp lailawk tawh. An ruahman dan chuan July 13 aṭangin tournament ṭhenkhat chu khelh chhunzawm theih beisei a ni.

Mahse, hri lengin reh lam a pan hleithei lo a, ram hrang hrangah kai thar an la tam zel avangin an chawlh hun tur hi tih sei a ngaih phah. Mipa inelnaah chuan ATP 500 tour zinga pathumna Hamburg Open chu khelh a ni dawn ta lo.

Hmeichhe inelna lamah chuan Bastad, Bucharest, Lausanne leh Jurmala-ah te an khel dawn lo a, inelna dang pahnih - Palermo leh Karlsruhe Open te pawh ṭulh mai theih dinhmunah an ding.

ATP chairman Andrea Gaudenzi chuan, "Tennis fans, player leh tournament in a kaihhnawih zawng zawngte hriatthiamna kan ngen. Anmahni ang bawkin hrehawm kan ti, kan zavaia ṭhatna tura rorel thiam pawh a harsa hle, inkhelh loh hi a kawng kan hriat theih chu a ni rih si," a ti.

Wimbledon an ṭhulh fel tawh a; August thla tawpa khelh tur US Open erawh a hun pangngaia khelh theih an la beisei, May thla a khelh tur French Open chu September thla chawhnu lam atan an sawn fel tawh.