Bryant-te post mortem result ti chhuak

Basketball player ropui leh ngainat hlawh ber zinga mi Kobe Bryant chu January 26, Pathianni zan dar 11:15 (IST) vel khan helicopter chesual avangin a thi. Chetsualnaah hian Bryant-a fanu Gianna (Gigi) leh midang pasarih - Alyssa Altobelli, John Altobelli, Keri Altobelli, Sarah Chester, Payton Chester, Christina Mauser leh pilot Ara Zobayan te an tel.

Zirtawpni khan Los Angeles County Medical Examiner-Coroner office-in Bryant-te post mortem result hi website kaltlangin an puangzar a, an thih chhan hi 'blunt trauma' niin pilot Ara Zobayan chu drugs leh zuah a fihlim.

Report hi phek 180 zet a ni a, endiktute chuan, "January 28-a mi pakhua thihna chu 'blunt trauma'-ah a ngai a, thih chhan chu chetsualna vang a ni," tiin a sawi. Blunt trauma hi thil danglam vak ni loin na taka insawh tihna a ni ber.

Byrant hian a nupui Vanessa baka a fanu dang pathum Natalia, Bianca leh Capri te a kalsan. Vanessa hian helicopter enkawltu company chu court-ah a khing a, pilot Zobayan chu thlawhchhuah hmain khaw awm dan a endik hmasa loah a puh.

Kobe Bryant hi Los Angeles Lakers tana shooting guard, jersey number 8 leh 24 ha ṭhin a ni. NBA bikah LA Lakers tan chauh a khel a, kum 20 tehmeuh a khelhna Lakers hian amah chawimawi nan player dang hak ve theih loh turin 8 leh 24 te an chawlhtir.

Black Mamba tia hminglem an pek Kobe hian Lakers-a a khelh chhungin NBA championship vawi nga a champion pui a, All-Star team-ah vawi 18 a tel tawh a, All-NBA Team member-ah vawi 11 telin All-Defensive team member-ah vawi kua a tel thei. 

Lakers tan 33,643 points score sakin he team tana point score hnem ber a ni a, NBA pumpuiah pathumna a ni bawk. NBA-a a ropui tluk zetin ram tan pawh a ropui a, FIBA Americas Championship, 2008 Beijing Olympic leh 2012 London Olympic-ah te khan USA a champion pui a. April 2016 khan Kobe Bryant hian basketball inelna a chawlhsan.