El Clasico - kan nghak chhuak leh ta!

Spanish football mai ni lo, football khawvelah Real Madrid leh Barcelona aia inhuatna ril zawk hi sawi tur a tam lo - club inhal tak pahnih hi zanin dar 1:30-ah an intawng dawn e.

Team pahnih intawnna tur hi Copa del Rey semifinal first leg a ni a, Real Madrid khelmuala inkhel tur an nih avangin Carlo Ancelotti nauten beiseina an nei sang zawk ngei ang.

Barcelona-in La Liga-ah hma an hruai mek a, an hnuai chiaha awm Real Madrid aia an sanna chu point sarih a ni - mahse, team pahnih hian kartawp league match-ah thawnthu inang an nei a, point an hloh ve ve.

Real Madrid hian an mikhual Atletico Madrid chu 1-1 in an inhnehtawkpui a, Barcelona hian rin loh takin team tenau Almeria chu 1-0 in an ngam lo thung. Team pahnih tan 'puja' fuh loh lai a ni ve ve a, zaninah fan-te lawmna thlen an tum dawn.

Hmelma kumhlun

Real Madrid-in Barca petchhuah an châk lehzual ang - a chhan maw? La Liga-a an phak loh awmchhun an ni mek a, Spanish Super Cup final-ah an ngam lo tawh bawk a, Copa del Rey aṭanga an inpetchhuahtir leh a nih ngat chuan an tan mualphona a ni dawn.

Real boss Ancelotti tan pawh Xavi-a enkawl Barca indantir zel hi mualphona tling thei a ni a, Italian coach hian tlawm a duh dawn lo - first leg chauh la ni mah se, second leg-a Barca beiseina tur zawng zawng pawh chhu chata chak ngei an duh ang.

Madrid khaw club tan beiseina tisang zual turin tun hnaiah Barca result a ṭha tawk lo - Almeria laka an tlawm hma hian Europa League knockout round-ah Manchester United chu 2-1 in an ngam lo a, European football-ah pawh beisei tur an nei tawh lo.

Barca kal vung vanglai chu chelh dinin a awm a, Real hian an lo hneh ve leh thei dawn em, tih chu zawhna awm mek a ni a, zaninah a chhanna pekin kan awm dawn e.

Lewy tel lohna

Match hnih a zawna tlawm zawh hnu lawka Real hmachhawn hi Barca tan ṭawngṭai chhannaa chhal a harsa ang - striker chhuanvawr Robert Lewandowski chu a inlan theih a rinawm lo bawk.

Polish striker hian tun season-ah Barca tan match 31 khelin goal 25 a khung tawh a, Lewy tel loin Barca tlarhma an hlauhawm lo sawt ang tih a chiang a, Real tan chuan Bayern Munich striker hlui awm lo tur hi duhthusam a ni ang.

Hei chauh a ni lo - Ousmane Dembele leh Pedri te chu malpui hliam vang thoin an inlan theih a rinawm lo a, player pathum thiamna leh team tana an ṭangkaina thlir ila, Barca tan an pathum awm lo tur hi hnual rawihna tham a ni.

Catalan club tan Ansu Fati inhliam erawh a dam hman beisei a ni a, chutihrual chuan bul a ṭan a rinawm chuan loh avangin Barca fans tan lawmna han zuan tawr tawrna tur niin a lang lo.

Inlan dan

Lewy awm loh laiin Ferran Torres mawhphurhna a sang dawn a, Manchester City forward hlui hi number 9-ah khelin, Raphinha leh Gavi ten an thlawp tura ngaih a ni a, an la ṭha tawk hle.

Barca tan Frenkie de Jong, Sergio Busquets leh Sergi Roberto ten midfield an luah ang a, tlarhnungah Jules Kounde, Ronald Araujo, Andreas Christensen leh Alejandro Balde te inkawp tura ngaih a ni a, Real tan a awlsam bik ngawt lo ang.

Real-in an ṭhat dan berin Barca an lo mikhual thei dawn bik lo - David Alaba chu Liverpool nen an inkhelh ṭuma a hliam avangin a inlan thei dawn lo a, Rodrygo-a'n training zawm ve tawh mah se bul ṭan nan chuan a la hma hret mai thei.

Hetihlai hian damlo Aurelien Tchouameni chu a dam tawh a, bul a ṭan a nih chuan midfield-ah Luka Modric leh Toni Kroos nena inkawpin, Federico Valverde a tawlh hma ang a, tlarhmaah Karim Benzema leh Vinicius Jr te nen an inkawp thei ang.

An inpeih e

Real-in an league match hnuhnung berah Atletico an inhnehtawkpui a, an inkhelh zawhah coach Carlo Ancelotti chuan Copa del Rey atana an inbuatsaih nghal tur thu a sawi - an ti mai mai lo.

King Carlo hming lem an pek coach chuan, "Pathianniah kan chawl hahdam ang a, Thawhṭanniah training kan nei lehnghal ang. El Clasico atana inbuatsaihna ṭha zawk kan neih theih nan Thawhlehniah tactical lam thil kan zir ang a, kan ṭhat dan bera khelh kan tum ang," a ti.

Ancelotti chuan, "Tunah chuan Copa del Rey hi a pawimawh ber tawh - nomawi kan hnaih takzet a, minute 270 chiahin min dang tawh a ni," a ti a, Barca hneh ngei a tum.

Almeria laka an tlawm hnuah Xavi-a'n, "Tun season-a kan khelh chhiat ber a ni," tiin, na takin a thinrim thu a tlangaupui a, zaninah a team hi hnehna chanpui ngei a beiseipui ang.