Foden-a'n ngai a awh leh ta

Manchester City chuan FA Cup fifth round-ah Bristol City 3-0 in an hneh a, quarterfinal an lut. Thawhlehni zan inkhelah hian City tan Phil Foden-a'n goal hnih a khung a, Kevin De Bruyne-a'n goal khat a belh bawk.

Pep Guardiola hote hian League Cup nomawi chawi tawh lo mah se treble champion thei an la ni a, FA Cup bakah Champions League leh Premier League nomawi chawi vek thei an la ni.

Chak phu City

Nigel Pearson kaihhruai Bristol-in match 12 chhung hneh loh tawng lo mah se Man City meuh chelh tur chuan an patuai deuh. Ashton Gate Stadium-ah City an tlangnel nghal a, Kalvin Phillips-a'n ṭan phatah crossbar a pet per nghal.

Minute sarihnaah team goal mawi zet hmuh a ni a, a hmawr bawktu chu Foden a ni. Vei lam aṭangin Nathan Ake-a'n vawrh chhoin Riyad Mahrez leh De Bruyne ten wall pass hmangin Bristol tlarhnung an ṭhiat a, Mahrez cross chu Foden-a'n goal-ah a chantir.

Man City-in inkhel an thunun a, goal hmaah captain armband hrengtu De Bruyne a hriam tawk lo. Belgian midfielder De Bruyne bakah Ruben Diaz leh Julian Alvarez ten chance ṭha an hlah bawk.

Minute 74-naah Foden bawk a rawn inlar a, English midfielder hian Alvarez-a ball pek chu cool zetin a khung. De Bruyne-a'n player danglam bik a nihna a rawn pholang a, minute 81-naah box pawn aṭangin goal kilah tak a pet lut.

Foden a dam

Nottingham Forest-in Man City an chelh ṭumin Phil Foden chu goal mamawh lai takin minute 89-naah thlak a ni a, City leh RB Leipzig te 1-1 a an inhnehtawk ṭumah phei chuan English midfielder hi bench-ah a ṭhu tluan.

Kar liam taa Bournemouth an hmachhawn ṭumah erawh Foden hian bul a rawn ṭan a, goal a khung bakah 4-1 ngawtin Man City an chak. FA Cup-ah Foden a che ṭha zui a, goal hnih a khung leh bawk.

Foden chuan, "Tunah chuan 100% in ka fitness a ṭha a, nuam ti takin ka inkhel leh thei tawh. Ka football zin kawngah hun hrehawm tak ka tawng a, chutihrualin player dangte pawhin an tawng vek. Hun harsa kan hmachhawn dan hi a pawimawh ber chu a ni," tiin inhliamin a tlak buak vanga harsatna a tawh thu a sawi chhuak.

City boss Pep Guardiola chuan, "Foden hi hmasawn zawngin a kal char char a, tun season-ah erawh harsatna a tawk. Tlemin a tla hniam a, tunah erawh a vanglai hun a hmang chho leh ta," tiin a sawi ve bawk.

Engtin zel?

Man City-in 3-0 ngawtin hnehna an chang a, insiamṭhat erawh an la mamawh. Pep-a hote hian inkhel thunun chunga goal hnihna an khung vat loh avangin talbuai thei dinhmunah an ding.

Bristol forward Sam Bell-a'n hnai tak aṭangin a khung lo a, Alex Scott-a'n keeper Stefan Ortega tan hna a siam bawk. Championship club hian siphurh chu sut se, Man City hi talbuai thei dinhmunah an ding a, Premier League chu ni se point hloh thei dinhmunah an ding tihna a ni.

Chutihrualin Pep-a'n squad ṭha tak a nei tih a lang a; player pawimawh Kyle Walker, Rodri leh Erling Haaland te bench-ah an ṭhu tluan thei a ni. City hian March 4, Inrinni hian Newcastle United an mikhual dawn a, Citizen tan chetsual a thiang tawh lo.