Khatla TBL leh Tuikual South an sang zel

Mizoram Super League season riatna a kal mek a, league round thawh hnihna an khel mek - tawnhriat nei ṭha Khatla TBL chuan Thawhlehni zan khan Champhai District BBA chu 97-59 in an hneh.

R. Dengṭhuama Indoor Stadium, Mualpuia inkhelah MSL hmasa pahnih champion tan Joshua Keys-a'n point 20 a nei a, tualchhung player Eddie Zaithanmawia (18), Chuaudingliana (16), Vanlalṭhazuala (13) leh Michael Liansanga (10) te an che ṭha bawk.

Champhai hian MSL an khelh vawi khatna a ni a, an tan thil a la awlsam lo. Khatla South Barons an hneh bak chu chak ni hmel an la hmu lo, season tirah semifinal beisei mah se an tan ban phak a harsa ang.

Nizan khan Khatla TBL hian champion lai Zarkawt BCA an hmachhawn zui a, result kan hre hman lo. Team pahnihte tun season tir lam an intawn tawhnaah BCA hi point hnih chauhin an chungnung zawk.

Thawhlehni zan inkhel dangah Tuikual South chuan Khatla South Barons chu 90-73 in an hneh. Phengphehlep an chak theih nan Jeremy Ireland chuan point 30 neiin a thawh hlawk fal hle.

Point 15 neitu Dennis Lalmuanpuia a che ṭha bawk a, tawnhriat nei ṭha F. Zodinthara chu inkhel bul ṭantu zingah tel lo mah se point sarih a nei hman tho a, inelna sang leh boruak lianah chuan Dina hi a la pawimawh zel ang.