Blackburn lakah Leicester an tlawm

Championship club Blackburn Rovers-in Leicester City chu 2-1 in an hneh a, FA Cup aṭangin Premier League club an tla. King Power Stadium-ah Blackburn tan Tyrhys Dolan leh Sammie Szmodics ten goal an khung a, Foxes tan substitute Kelechi Iheanacho goal khungin result a tidanglam pha lo.

Leicester boss Brendan Rodgers chuan, "Dem tur an awm a nih chuan keimah hi dem tur chu ka ni. Player ka siksawi a, vanduaithlak takin a fuh lo. Chutihrualin player lut zinga pali kha FA Cup champion tawh an ni a, chak turin kan ṭha tawk. Mahse kan mualah Championship club kan hneh lo a, insiamṭhat kan mamawh a ni," tiin a sawi.

Foxes hian Blackburn an hneh loh hma hian Man United leh Arsenal te an hneh lo a, match thum a zawnin an chak tawh lo. Blackburn erawhin kum 10 chuang Premier League an khel pha tawh lo a, chutihrualin Championship-ah palina ni mekin season tharah Premier League khelh beiseina sang tak an nei a ni.