World Cup record siamtu Just Fontaine a thi

FIFA World Cup vawi khata goal khung tam ber Just Fontaine chu nimin khan kum 89 mi niin Toulouse, France-ah a thi. Kum 1958 World Cup-ah khan goal 13 ngawt a khung a ni.

August 18, 1933 khan Fontaine hi Morocco-ah a piang a, a pa hi French niin France tana khelh a thlang. Sweden-a World Cup khelh ṭum khan match ruk lekah goal 13 a khung a, hei hi tun thlengin a larpui.

Fontaine hian USM Casablanca-ah bul a ṭan a, Nice leh Reims tan khel lehin club level-ah hian match 284-ah goal 258 a khung pha. France tan pawh Fontaine hian match 21-ah goal 30 a khung hial. Player goal khung thei bik ni mah se inhliam vangin kum 28 lekah football khelh a chawlhsan.

Inkhelh a chawlh hnuah Fontaine hian France team bakah Paris Saint-Germain, Toulouse leh a pianna ram Morocco te a enkawl a ni.

March 2004 khan Pele chuan footballer la dam zinga ṭha a tihzual player 125 a thlanchhuah zingah a telh. November 2003 khan UEFA Jubilee Awards-ah French Football Federation chuan kum 50 chhunga French player ṭha berah an puang.