Hnehna nen Djokovic a inlar

Australian Open nomawi a chawi hnua a vawi khat nan Novak Djokovic a inlan. Thawhlehni zan khan Dubai Tennis Championship-ah Tomas Machac hnehin last 16 a inhlangkai.

Centre Court-a inkhelah Djokovic hian awlsam takin hnehna a chang mai bik lo. Kum 22 mi Machac hi 6-3, 3-6, 7-6 (7-1) in a hneh hram, malpui hliam vanga kar thum chawl hlim a nih avangin Novak tan result ṭha chu a ni tho.

World number 1 Djokovic chuan, "Harsatna min siamsak hnem khawp mai, amaherawhchu a chinfel dan ka lo hre hlauh ṭhin kha a lawmawm lai chu a ni. Tun hnaiah ka inkhel tam tawk lo a, tun tournament chhung ngeiin hma ka sawn ka beisei," a ti.

Tun kara ranking chhuak tharah khan Djokovic hian world number 1 ni rei thei ber record a siam, a chung berah hian chawlhkar 378 teh meuh a awm, tun hma lama record lo chelhtu Steffi Graf (377) chu a khum.

Djokovic chuan, "Serbia rama naupang pakhat khan duhthusam a nei ṭhin, chu duhthusam chu tennis world number 1 nih leh Wimbledon champion nih kha a ni a, tunah chuan vawi khat mai pawh ni loin vawi tam tak ka tawng ta.

"Naupan laiin duhthusam kan nei ṭheuhin a rinawm, chumi tihlawhtling theia ka awm hi ka nihlawh takzet," tiin a tennis zinkawngah a lawm tawk hle tih a sawi a, record dang pawh neih zel a tum ang.

Grand Slam title 22 a nei tawh a, major tournament champion hnem lamah hian Rafael Nadal nen an intluk mek. Tun season chhungin French Open, Wimbledon leh US Open te an la khel dawn, player pahnih inelna hi a la ngaihnawm dawn.

Thawhlehni zan inkhel dangah seeded pathumna Daniil Medvedev chuan Matteo Arnaldi 6-4, 6-2 in a hneh. Russian tlangval hi tun hnaiah a zawnin match 10 chhung hnehna a chang ta.

Seeded palina Felix Auger-Aliassime pawhin Maxime Cressy 7-6 (4), 3-6, 6-3 in a hneh a, inkhel dangah seeded parukna Karen Khachanov chu Botic van de Zandschulp lakah 7-5, 6-2 in a chak lo thung.