Liverpool-in hlawkna an tel

Premier League club Liverpool chuan 2021-22 a club sum chevel chungchang an zirchianna an tichhuak a, season hmasa khan chhiah pek hmain pound maktaduai 7.5 hlawkna an tel phak.

Season hmasaa Liverpool sum che vel hi season hmasa nena khaikhinin pound maktaduai 107-ah a sang chho hrim hrim a, season hmasa chhunga Reds sum lakluh hi £594mtd a tling phak - a tam tham hle.

Liverpool sum lakluh pun chhan langsar tak chu khelmuala an chet ṭhat vang a ni a, season hmasa khan season tawp thlenga nomawi pali an beisei avangin match khelh tur awm zat, match 63 chu an khel vek a, FA Cup leh League Cup-ah chiah an champion thung.

Reds hian club inrelbawlna lamah a hma season aiin £69mtd zetin seng hnem zawk mah se, 2018-19 season hnua a vawi khat nan hlawkna hi an tel a ni - matchday revenue (inkhel en man, ei leh in, club bungrua hralh man etc.) aṭanga an sum hmuh pawh a pung hle.

Merseyside club hian a hma season-ah matchday revenue an neih chu £83mtd niin, season hmasaah kha chuan £86mtd a ni thung - Covid-19 in zia lam a pan leh tak vang a ni ber.

Liverpool managing director Andy Hughes chuan, "A hma season-a kan sum lakluh report kha hripui len lai a nih avangin, tuna kan report-a sum ṭhenkhat hi pung angin a lang ve thei bawk.

"Chutihrual chuan sum leh pai inrelbawlna kawnga kan kal dan dik leh nghet a lang zel a, club ngelnghet tak kan din chho mek zel a ni - chu chu sum leh pai lam enkawltu aṭang chuan kan thlir dan a ni," a ti.

Deloitte Money League an tih mai, European club-te sum lakluh dan zirchiannaah pawh Liverpool hian hma an sawn hle a, a hma season-a pasarihna aṭangin pathumnaah an lo awm chho tawh a ni - an chungah hian Manchester City (£619.1mtd) leh Real Madrid (£604.5mtd) chiah an awm.

Liverpool hian season hmasa khan player thar pasarih lalutin, an lakluh zingah £376mtd man Ibrahima Konaté leh a man atana £37mtd an pek phawt, forward Luis Diaz te an tel a, player 22-in contract thar ziakin, contract ziak thar zingah Jordan Henderson, Harvey Elliott, Andy Robertson, Alisson Becker, Stefan Bajcetic leh Diogo Jota te ho an tel a, player hlawh tlem lo takte an ni hlawm.

Reds chuan tun hnai kum nga chhungin, Anfield enkawlna chu 40% a a pun chhoh hman thu an sawi a, hetihlai hian sumdawnna aṭanga an sum lakluh chu £29mtd-a pung chhoin £247mtd a kai hial a ni.

Hughes chuan, "Football club neih man a pung zel a ni ber a, mahse, hetihrual hian club a ṭhan zel theih nan theihtawp kan chhuah reng a, player-te contract thar kan ziahpui bakah nipuia hman theih turin Anfield Road Stand thar chu kan peih hman kan beisei bawk a ni," a ti.

Liverpool Managing Director chuan sawi zawmin, "Tun hnai kum nga chhungin club bungrua leh hmunhma atan £250mtd ngawt kan seng a, player, staff leh min ṭantute tan world class hmun hma kan chhawpchhuahsak a ni," a ti a, hnathawk ṭha a inti hle.

Mahse, Liverpool hian tun season-ah beisei an phak lo - season hmasaa an champion-na FA Cup leh League Cup-ah nomawi an humhim thei lo a, Premier League-ah champion beisei chi a ni tawh lo a, Champions League last 16 aṭanga tla thei dinhmunah an ding mek bawk.

Hughes chuan, "Tuna pawimawh ber chu khelmual chhung leh pawnah a ṭha thei ang bera season khar a ni a, chumi rual chuan fel taka club inrelbawlin, sumdawnna lama kan ṭhan zel theih dan kan ngaihtuah ang - chu chuan player thar lakluh leh club hmunhma tihchangtlun kawngah min pui zel dawn a ni," a ti a, Reds chu khelmual bakah sumdawnna khawvela hmasawn zel turin a beisei.

Liverpool hian nizan khan Wolverhampton Wanderers nen league match an khel a, he thu buatsaih a nih lai hian result kan hre hman lo.