Krejcikova a kang sang ve leh ta

Dubai Open champion Barbora Krejcikova chu ranking sang zual 20 zingah a tel ve leh ta. Tun kara world ranking chhuak thar berah player 14 ngawt kal kanin 16-na dinhmun a rawn luah.

Kum 27 mi Krejcikova hian 2021 French Open nomawi a chawi, a hnu lamah erawh result a nei ṭha tawk lo. Kar hmasa a khelh zawh tak Dubai Open-ah erawh ranking sang zual pathum ngawt hnehin a champion.

World number 2 Aryna Sabalenka lakah 6-0 in set hmasa hloh mah se a tho chhuak thei a, a hnuah world number 3 Jessica Pegula hnehin final-ah number 1 Iga Swiatek meuh lakah pawh set hloh loin hnehna a chang thei a ni.

Simona Halep a tlahniam zel thung. World number 1 hlui hi nikum US Open hnuah a la inkhel leh lo, a hliam dam tawh mah se damdawi hman phal loh chungchangah buaina a neih avangin a la inkhel thei lo.