Thompson leh Poole hoin Warriors an chak

Nimin zing NBA regular season inkhelah Golden State Warriors chuan Portland Trail Blazers lakah 123-105 in hnehna an chang a, a thiam zual pariat inelna playoff khel turin an dinhmun an sawhnghet zel.

Golden State tan Jordan Poole-a'n point 26 a neih bakah assist vawi ruk neiin rebound vawi nga a la bawk. Player ṭha Klay Thompson chuan point 23 a nei bawk a, an mi pawimawh Stephen Curry la chhawr thei lo mah se team ṭha an hneh.

Trail Blazers tan hmanni lawka point 71 neitu Damian Lillard chuan point 25 a nei. Lillard hian Houston Rockets laka point a neih hnem ṭum khan free throw vawi 16 ngawt a lut - Warriors erawhin a lakah an foul duh lo.

GSW coach Steve Kerr chuan, "Damian Lillard kha player hlauhawm bik a ni tih kan hria, chuvangin inkhelh hmain ani kan dan theih dan tur leh point a neih tlem dan tur kan ruahman sa vek, a hlawhtling ta chiah bawk.

"Kan intawn hmasak khan vannei takin kan chak tawh bawk, tun ṭuma kan chak nawn hi a lawmawm hle," a ti. February thla tir khan an inkhel tawh a, point 23 zeta an hnufual hnuah 25-122 in an lo hneh let tawh a ni.