Neuer thlaktu tur Ter Stegen - Flick

Germany coach Hansi Flick chuan inhliam vanga Manuel Neuer a chawlh chhung chuan Barcelona goalkeeper Marc-André ter Stegen chu Germany no. 1 a nih tur thu a sawi.

Bayern Munich manager hlui Flick chuan, "Hemi chungchang hi kan sawi ngun tawh a, a indawh dan tur pawh a chiang a ni. Goalkeeping position hi kan buai lohna ber a ni zawk. Goalkeeper ṭha pathum aṭanga panga kan kawl a ni," tiin a sawi a, Ter Stegen-a'n bul a ṭan tur thu a sawi.

Barca keeper Ter Stegen elpha tur hi an awm rih lo a, Flick-a thutlukna hi ziaka dah sa ang maia chiang a ni. Tun dinhmuna Ter Stegen elpha ber chu Eintracht Frankfurt keeper Kevin Trapp a ni a, keeper ṭha tak ni mah se Barca keeper a tluk pha lo.

Flick chuan sawi chhunzawmin, "Tlar hnungah kan insiamṭhat a ṭul hle. World Cup kan thlir let chuan goal chhuah tlem apiang an ding chang. Chhuanlam siam lo a, goal kan venhim a ngai," tiin a sawi. Germany hian Qatar-a neih zawh tak World Cup-ah khan first round an paltlang lo.

Germany hian March 25, Inrinni zanah Peru nen friendly match an khel ang a, Belgium nen March 28, Thawhlehni zanah friendly match an khel leh ang. Belgium hian World Cup zawhah Roberto Martinez thlakin coach atan Domenico Tedesco an lalut a ni.