Pogba lo kirna inkhelah Juve an chak

Paul Pogba chuan tun season atana a match hmasa ber a khel ve chauh! Juventus a zawm leh hnuah Pogba a inhliam a, season chawhnu lamah a dam ve hman chauh a ni - Old Lady chu Torino lakah 4-2 in a chakpui.

Thawhlehni zan inkhel dangah AS Roma chu Cremonese mualah 2-1 in an tlawm a, manager Jose Mourinho nauten palina dinhmun luah theihna remchang an neih chu an bawhpelh.

Juve an chak

Turin khawpuiah mikhual Torino lamin Yann Karamoh-a goal hmangin hma an hruai hmasa, goal an khung hun hi minute hnihna lek a ni. Mahse, Juve tan Juan Cuadrado chuan a sut a, mikhual lamin Antonio Sanabria hmangin hma an hruai nawn leh sak.

Juve lamin si an phur rei duh bik lo, first half hun pek belhah Danilo chuan a tauh lut hram a, 2-2 in chawlhlawk an hmang. Second half minute 69-naah Pogba chu bench aṭanga dah luh a ni a, inkhel boruak a ti danglam hle.

Pogba luh hnuah Juve game a nung a, beiseina an nei thar tih a lang bawk - goal pawh an sualchhuak chhunzawm. Defender Gleison Bremer-a'n a tauh lut a, ani bawk hian Adrien Rabiot khung tur siamsak bawkin point thum an hmu.

Allegri a lawm

Juventus manager Massimilliano Allegri chuan, "Team ṭha tak kan hmachhawn a, ṭum hnih ngawt goal kan chhuah hmasa bawk. Dinhmun hniama kan din hnuah huaisen takin kan bei let a, kan phu ang ngeiin point thum kan hmu.

"Table en ila, 10-naah kan awm mek. Hei hian hmasawn kan ngai nasa hle tih a lantir," a ti a, an midfielder pawimawh Pogba lo kir chuan phurna a siamsak bakah, an goalkeeper Wojciech Szczesny-a'n club tana match 200 a khel tling chu a lawmpui thu a sawi bawk.

Juventus hian sum chungchangah dan dik loa thil an tih avangin hrem an ni a, point an hmuh sa 15 paihsak an ni. Point hi paihsak lo ni se la chuan Napoli hnuah pahnihna vel bawrah an awm phak ang, paih lo pawh ni se Naples club erawh point 15 bawrin an phak lo thung.

Roma an tlawm

Table mawngphah lama talbuai lai Cremonese lakah AS Roma 2-1 in an tlawm. Cremonese tan Daniel Ciofani leh Frank Tsadjout ten goal an khung a, mikhual goal neih chhun hi Leonardo Spinazzola khung a ni thung.

Inkhelah hian Roma manager Jose Mourinho chu hnawh chhuah a ni. Portuguese manager hian fourth official lakah ṭawngkam mawi lo a hmang a, tun season chhungin vawi thum ngawt red card a hmu tling ta.

Mourinho chuan, "Thil thlen danah ka lawm lo a, mahse atthlak takin ka che lem lo. A theih chuan dan hmanga enlet leh ni se ka ti," a ti a, a ṭawngkam leh chet dan chu hnawhchhuah tawhna tur niah a ngai thei lo a ni.