Nadal a inkhel thei rih lo

Rafael Nadal chu kan hma lawka Masters 1000 event pahnih - Indian Wells leh Miami Open aṭangin a inhnukdawk. Spanish tlangval hi January thlaa khelh zawh tak Australian Open hnuah a la inkhel leh lo a ni.

Kum 36 mi Nadal hi Australian Open-ah khan a khel bawr a hliam, a tira an rin dan chuan chawlhkar riat vel chawl tura ngaih a ni. Mahse, beisei ang ngawtin a dam hma ta lo, kum tam lamah chuan hliam pawh a dam har hret niin a lang.

Indian Wells director Tommy Haas chuan, "Rafa hi dam leh thuai turin duhsakna kan hlan, nakkumah chuan kan tournament-ah hian a rawn inlan ve leh theih tawh ngei kan beisei," tiin a sawi.

California-a inelna neih ṭhinah hian kum 2007, 2009 leh 2013 khan Nadal hi a champion, season hmasa khan final lut mah se Amercian tlangval Taylor Fritz a hneh lo. Indian Wells baka Miami Open atan pawh a inpeih hman dawn lo.

Ruahman dan chuan Nadal hi April 9 aṭanga khelh tur Monte Carlo Masters-ah a inlan ang, clay court inelna hi vawi 11 ngawt a champion tawhna hmun a ni. Season dang ang bawkin clay court atan rilru zawng zawng hman a tum dawn a ni mai thei.

Nadal chuan, "Inkhel thei ka la ni lo, uluk taka inenkawl ka la ngai. Doctor kaihhruaina hnuaiah gym ka kal thei tawh a, zawi muangin a ṭha thei anga ber nih leh ka tum ang. Indian Wells leh Miami Open ka khel thei lo tur hi pawi ka ti hle.

"United States lama min ṭantute chungah ngaihdam ka dil, tunah inhmu thei lo mah ila season tawp lamah chuan US-ah ka zin theih ngei ka beisei," a ti. Grand Slam zinga hnuhnung ber US Open chu September thla hian New York khawpuiah khelh a ni ang.

Tun hnaiah a zawna final vawi hnih khel Cameron Norrie leh Carlos Alcaraz te pawh an chawl rih dawn. Anni pahnih hi chu Mexican Open khel tura tih an ni a, tournament an khelh tur aṭang hian an inhnukdawk.