French football hotupa Noel le Graet a bang

Football khawvela ram langsar ber pawl France rama football thuneitu sang ber French Football Federation president Noel le Graet chu President a nihna aṭangin a bang a, a ban chhan hi pawl inrelbawlna fel lo chungchanga report awm leh, mipat hmeichhiatna lam hawia che mawi loa puh a nih vang a ni.

France sorkar chuan nikum October aṭang khan FFF hi an chhui chiang a, pawla inenhranna leh mipat hmeichhiatna lam hawia mawi lo taka chetna awm ṭhina puh an nih vang a ni - January khan Noel le Graet hian FFF chhui zawh a nih hma atan a chawlh lailawk thu a puang a, tunah chuan a bang ta.

February thlatir khan France sorkar chuan FFF an zirchianna report an tarlang a, "Noel le Graet hi hmeichhe laka a chet ṭhin dan, vantlang hmaa a ṭawngkam hman leh pawl inrelbawlna fel lote thlirin, French football kaihruai zel turin a tling tawk tawh loah kan ngai a ni," an ti a, a hna chu thawk leh tlak a nih tawh loh thu an sawi bawk.

Le Graet hian June 2011 aṭang khan FFF President hna hi a chelh ṭan a, kum 2024 thleng hun la nei mah se a bang ta zawk - France legend Zinedine Zidane chungchanga a ṭawngkam avangin bang tura nawr a lo ni tawh bawk.

FFF President bang ta hian, "France coach nih duhin min rawn phone pawh ni se, ka la lo ang," tiin Zidane chungchang a sawi a, player a nih laia France tana World Cup leh European Championship nomawi chawitu chungchanga a ṭawng dan avang hian dem a hlawh nasa hle.

French football thuneitu sang ber FFF chuan Noel le Graet ban thu hi puangin, "Khelmual chhung leh pawn lama pawl tana a hnathawh ropui tak kan hre reng a ni," an ṭṭparati a, sorkar zirchianna chu a rintlak tawk loh thu an sawi bawk.

Le Graet pawh hi a ban hnuah French infiamna chanchinbu L'Equipe hnenah a insawifiah a, France sports ministry zirchianna chu a ukil ten an khinlet tur thu sawiin, "Tu tan mah buaina ka thlen lo," tiin a sawifiah bawk.

Kum 81 mi Le Graet hmun ruak hi FFF vice president Philippe Diallo chuan June 2023 thleng a luah rih dawn a, Le Graet hi FIFA a nihna aṭangin a bang dawn em, tih erawh he thu buatsaih a nih thleng hian a la chiang rih lo.

January 2022 khan FIFA president Gianni Infantino chuan Paris, France-a FIFA Office tharah a aiawha hmun luah turin Le Graet hi a ruat a ni.