Bye Bye 2022-23

Kum 2022-23 season bik chu a hmawr kan lo bawk chho leh ṭan ta. Tun thla chawhnu lama Indian Premier League ṭum 16-na tur erawh boruak a in mung leh ṭan ta der a, kumin favang lama ICC World Cup, India-in kan thlen tur hmachhawp awm uah mai bawk nen. Cricket tui mite tan kum nuam a ni ngei turah ngai ang.

International lam

Tuna India-in Australia an mikhual mek inkhel result a zir hian June thlaa World Test Championship Finalist tur a chiang thawkhat tawh dawn. Hamara Desh lam chuan khual chhawng ṭha nih an tum der lo a, an spinner-te tana chet velna nuam ber turin, pitch phut leh ni khat ni aṭanga kawi nghal zawk zawk theiin an lo hmuak.

He thu ziah laia 3rd Test khelh mek pawh hi ni hnih chhungin an zo hman mai ang tih pawh a hlauhthawnawm tum tum ta mai. Hetiang huna India captain Rohit Sharma an Ravi a te pahnih Jadeja leh Ashwin a kawl hi chu vannei a inti ve ngei ṭhin ang.

Jadeja leh Ashwin te ball vawm pace leh ngil taka stumps zawna an vawm reng theihna hi India Pitch angah chuan a hlauhawm bik em em a, foreign pitch lamah che ropui lutuk ṭhin lo mahse, mahni tualzawlah na na na chuan hneh theih loh nun nei an ni lawi si a nih hi.

Domestic lamtluang

Rinkai zinga mi team game khel Saurashtra lamin kum 2020 an champion hnuah kumin Ranji Trophy lamah nomawi an han chawi leh thei a. Tunhnai kum 10 chhunga Ranji Trophy season kua khelh awma vawi nga final lut a, ṭum hnih champion thei Saurashtra hi, tun dinhmunah chuan India Cricket Powerhouse kan ti lo thei lo ang.

Chutirual chuan Plate group lama team tenau paruk awmkhawmnaa top 4-ah pawh kan Mizoram team te kan thleng pha ta lo erawh, players talent leh tumpuite enin, Cricket Association of Mizoram Administration emaw Management lam hian insawifiah tur chu an nei vein a hriat.

Professional Sports Organization an nih angin, administration leh management mumal tak nei tura ngaih an ni a, an lo la nei lo cheu a nih chuan a 'Governance' lam tal hian tun season liam ta Mizoram thlen chin sawifiahna an neih hi chu a ngai ngei ang.

Local Cricket

Local Cricket lamah 1st Div Mahuma Memorial tournament boruak hot tak min hlui mek. Karleh lama team pariat telten an final league match khelh ṭheuh turah finalist tur team la chiang lo leh tla thei dinhmuna ding team pali ngawt mai an la awm a nih hi, local Cricket boruak ti ngaihnawmtu a ni chiang hle.

Serchhip lamah Inter District cricket hmuhnawm tak huaihawt a ni a, tin hmeichhe cricket lam kan phak ang tawk tawka local cricket lama inelna huaihawt a ni hi thu lawmawm a ni. Cricket hi fur hunlaia khelh chi a ni si lo a, fur reina Mizoram ang khuavel atan chuan kan ṭhal neih hun rei lote hi ṭangkai thei ang bera kan hman a ngai zel ang.