Nipuiah pawh Arsenal an sang zel

Vau Thla a lo thleng a, thlasik boruak chu nipui boruakin a rawn thlak. Chungleng sava te pawhin di chhai an rel a, run hmun lendun zai an rel leh ta - hun bi leh nun phung inthlak mek mah se Arsenal awmna erawh a inthlak ve lo!

Premier League table chung ber chu Mikel Arteta nauten bu an cheh remna hmun a ni a, tunah chuan khelh zat inangah champion lai Manchester City aiin point ngain an sang fal leh ta, khelh hmabak 14 an la nei.

Nilaini zanlai inkhelah Arsenal hian an mikhual Everton 4-0 in an sawp. Bukayo Saka-a'n goal hmahruai khungin, forward harhvang tak Gabriel Martinelli chuan goal hnih a khung a, captain Martin Odegaard pawhin a khung bawk.

Laipui a puak

Mikel Arteta-a'n Leandro Trossard, Saka leh Martinelli te bul a ṭan rual tir leh a, striker Eddie Nketiah chu bench lamah awmin, training pangngai zawm tawh Gabriel Jesus chu squad-ah telh a la ni lo - bench lamah Thomas Partey leh Emile Smith Rowe te an awm.

Emirates Stadium a ni bawk a, mualneitu Gunners lamin inkhel an thunun hneh viau. Oleksandr Zinchenko-a ball fing dawngtu Saka-a'n amah vengtu a vir khum hnuah England keeper Jordan Pickford dan theih lohin goal hmahruai a khung.

England international Saka hian Martinelli tan a siamsak zui, official lamin offside tiin phar mah se VAR hman a nih hnuah goal hi an pawmsak. Kum 19 mi Saka hi EPL-ah goal leh assist vawi 50 nei tling thei player naupang parukna a ni hial.

Chawlhlawkah 2-0 a ni a, chak tur a chiang tawh. Second half-ah pawh Gunners bawk hlauhawm lehin Leandro Trossard thawhrah sengtu Odegaard-a'n hnai takah a khung a, hun tawp dawnah Martinelli chuan Eddie Nketiah siamsak a khung leh bawk.

Arsenal an hmuhnawm

Oleksandr Zinchenko hi defender a ni a, a club thar Arsenal tan erawh ball semtu pawimawh a ni phak. Mual sir aṭangin a laiah a tlan lut hnem a, goal khatna a siamsak bakah Odegaard leh Martinelli-a goal hnihna luh theih nana bul ṭantu a ni.

Brighton aṭanga an lakluh Trossard hi thlasik bazara an lak tum 'ber' kha a ni lo. Mahse, Premier League-a tawnhriat nei ṭha a ni a, an mamawh hunah tak a rah thei, a man leh hlawh zat chhut phei chuan bazar fuh an inti veng veng viauin a rinawm.

Chelsea lamin chhawr tlak tawh loa an ngaih Jorginho pawh ball semtu bakah inkhel thununtu a la ni thei, hliam damkawr Partey tan hmun nghet chan leh nghal a huphurhawm viau mai thei - hun tawp dawna Smith Rowe rawn lut khan Arsenal fans lawmna a siam bawk ang.

Season hmasa league match khel kim vektu Saka pawimawhna a sang tual tual, a hlauhawm laia ball lalut ngam a nihna a ṭangkai leh ṭhin. Season kal laiah goal 10 a khung ta, nikuma a league goal khung a phak lohna goal khat chauh a ni ta, a khum ngei dawn niin a hriat.

Everton an buai

Premier League goal 17 chauh an la khung a, season kal laiah Everton hi team 20 zinga goal khung tlem ber an ni. Inkhelh hmain Sean Dyche-a'n a naute chu goal khung kawngah mawhphurtu vek an nih thu a sawi, mahse an khung thei ta chuang lo.

An league match hnuhnung 15 zetah chuan goal khat aia tam khungna an nei miah lo. Dyche-a'n hna a rawn thawh tirh khan Everton leh Leeds United te an hneh, an chak ṭum pawh hian defender pahnih James Tarkowski leh Seamus Coleman ten goal an khung.

Manager hmasa Frank Lampard awm lai aṭangin striker an mamawh thu an sawi, tun dinhmunah Dominic Calvert-Lewin a hliam mek. January bazarah khan striker lei tura ngaih ni mah se an lei lo, goal khung thiam an neih miau loh avangin harsatna a zual.

Player an duh ang an la lo a, dem tur an zawng nasa - fans tam tak chuan director of football Kevin Thelwell chu a hna tlin tawk loah an ngai. Pathianni zanah Nottingham Forest an tlawh dawn, point thum an hmu lo a nih chuan lungawi lo thawm a ring hle tawh ang.

"A nihna tak sawi chuan duhthusama ṭhain bul kan ṭan bik lo, minute 25-na vel aṭanga kan insiamṭhat dan erawh a lawmawm hle. Thil mak thlen theitu kan mamawh a, chutih hunah tak chuan Zinchenko leh Bukayo te an rawn lang.

"Goal khat kan khung tawh kha chuan kawng a inhawng zau. Second half-ah kha chuan kan khel ṭha takzet tawh a, sawisel tur hran pawh kan nei tawh lo, goal dang tam zawk pawh khung thei dinhmunah kan ding hial.

"Martinelli leh Trossard te kha an induhsak tawn em em a, ball an chanin khawiah nge an awm tih an inzawng hmu nghal chat zel, hetiang thil hi chu anmahni rawn siam chhuah a ni a, tun aia hmuhnawm zual kan la beisei.

"Khelmual chhunga Zinchenko pawimawhzia kan hmu, kha kha kan lakluh chhan chu a ni - team tan hian thil eng emaw danglam tak a rawn thlen. A rilru put hmang a dik a, theihna a nei sang bawk, goal venhim leh a nawr a thiam."
- Mikel Arteta, Arsenal Manager