ISL Playoff An khel ṭan dawn ta

India rama football league inelna sang ber Indian Super League playoff chu zanin dar 7:30 hian khelh ṭan a ni dawn a, match hmasa berah Bengaluru leh Kerala Blasters an inkhel dawn.

Season dangah chuan ISL hi league round khelh zawh a nih hnuah semifinal khelh nghal ṭhin a ni a, tun season-ah erawh team parukin playoff an khel dawn - top two-in semifinal an lut a, palina aṭanga paruknaten knockout match an khel dawn.

League table-a palina Bengaluru-in pangana Kerala Blasters hmachhawnin, pathumna ATK Mohun Bagan-in parukna Odisha an hmachhawn thung ang - knockout match hi single leg-a khelh tur a ni.

Single leg-a khelh tur a ni chung hian table-a sang zawk khelmualah zel khelh tur a ni a, league round-ah tihṭhat zawkin awmzia a nei - semifinal erawh double leg-a khelh tur a ni thung.

Bengaluru harhna

Tun season ISL-ah Bengaluru-in beisei an phak lo a, league match hmasa 12-ah vawi hnih chiah an chak a, Bangalore club hi playoff mitthlapui chu harsa tak a ni.

Mahse, Bengaluru hian season laihawlah harhtharna an chang a, an league match hnuhnung pariatah chak vekin, playoff hial an inpetkai - club phur vanglai tak a ni a, tum an châkawm lo ang.

Bengaluru tan tlarhnungah si ban nghaktu Gurpreet Singh Sandhu chu innghahna ber a ni leh dawn a, Alan Costa, Sandesh Jhingan, Prabir Das leh Roshan Naorem te ho a hmaa an din chuan an ngaihtuahawm dawn lo.

Midfield-ah match 18-a goal ruk leh assist vawi nga nei tawh Javier Hernandez chu innghahna a ni leh ang a, Fiji captain Roy Krishna, tun hnaia hming chher tak Siva Narayanan leh Sunil Chhetri te chu goal nawr kawnga innghahna tur an ni.

Blasters an ṭha

Kerala Blasters-in league round tawp lam an hmang ṭha tawk lo a, November - December inkara league match riat zet tlawm loa an kaltluan zara playoff khel hram hram an ni ber - an league match hnuhnung pariatah vawi hnih chiah an chak a, a bak zawng an tlawm vek!

League round-a Bengaluru nen vawi hnih an intawnah vawi khat ve ve an chak a, Blasters tan Bengaluru khelmuala hnehna hlado chham turin an ṭhat dan bera an khelhchhuah a pawimawh.

Kerala tan goal chhuah lo turin Ruivah Hormipam, Víctor Mongil leh Marko Leskovic te chet ṭhat a ṭul a, midfield-ah Ukrainian Premier League club Oleksandriya aṭanga loan-a Blasters zawmtu Ivan Kalyuzhnyi, Sahal Abdul Samad leh Jeakson Singh te mawhphurhna a sang ang.

Goal khung kawngah match 19-a goal li leh assist vawi ruk neitu Adrian Luna a pawimawh dawn a, match 20-a goal 10 leh assist thum neitu Dimitrios Diamantakos hming lam hmaih a thiang lo - Greece international striker tan hian top scorer nihna chance a la sang hle.