Zarkawt BCA an chungnung

Mizoram Super League champion lai Zarkawt BCA chuan anmahni elphak ber tura ngaih Khatla TBL meuh pawh a zawnin vawi hnih an hneh ta. Ningani tlai inkhelah BCA hi 101-98 in an chak.

Team pahnih intawn hmasakin Zarkawt club hi point hnih chauhin an chungnung, tun ṭuma an san zawkna pawh point thum chauh a ni. BCA an chak theih nan Joseph Allen chuan point 50 teh meuh a nei.

Lalrina Renthlei (16 points) leh Zonunsanga (12) ten an thlawp ṭha bawk a, tun season match kua an khelh tawh chinah an la chak fai vek. March 4, Inrinni tlaiah Tuikual South nen an inhmachhawn leh ang.

Khatla TBL tan player panga ngawtin point 10 an nei chuang thei, mahse mimala nei hnem fal an awm lo. Vanlalrinchhana chuan point 23 a neih bakah assist vawi thum neiin rebound ṭum thum a la bawk.

Team pahnih an inkhel tawk a, hmahruai pawh vawi 12 ngawt an inthlak kual. A tawpah BCA an vannei zawk a, champion lai an nihna a lang leh ṭhin. TBL hian champion an duh a nih chuan, hun pawimawh laia che fuh zeuh zawk nih an tum a ngai.

Nilaini zan inkhel pakhat zawkah Bungkawn LB Associates chuan Chanmari Vikings chu 87-77 in an hneh. LB hian vawi nga hnehna an chang tling ta a, table-ah pathumna dinhmun an luah - semifinal khel turin an dinhmun an siamṭha chho zel.