I League champion tur RoundGlass Punjab?
RoundGlass Punjab chuan hun ṭha an bawhpelh lo a, Nilaini zan khan Churchill Brothers chu 3-1 in an hneh. Punjab club hian point thum hlu tak an hlawhchhuah avangin I League-ah point ngain hma an hruai fal a, champion turin match hnihah point hnih chiah an hmu tawh.
Tau Devi Lal Football Stadium-ah RoundGlass Punjab tan Luka Majcen-a'n first half-ah goal hmahruai a khung hnuah second half-ah Chencho Gyeltshen leh Juan Mera ten an khung belh. Goan club-in goal thum an chhuah hnuah Martin Chaves hmangin goal khat an khung ve chauh.
Mizo pariat
I League inkhel pawimawhah Mizo tlangval pariat squad-ah an awm. Punjab tan Brandon Vanlalremdika, Freddy Lallawmawma leh Hmingthanmawia ten bul an ṭan a, bench-ah Daniel Lalhlimpuia a awm bawk.
Goan club-ah pawh Mizo pali tho an awm a, Lalremruata Ralte leh Vanlalduatsanga ten bul ṭanin Lalawmpuia Sailo leh Lalkhawpuimawia te bench-ah an awm.
Goal li chu
Aizawl FC champion puitu Hunthar tlangval Brandon-a'n mual vei lam aṭangin ṭha zetin a lalut a, Mizo tlangval hian Chencho pe lehin Bhutan Ronaldo ball pek chu minute 27-naah RoundGlass Punjab captain Majcen-a'n chiang zetin a khung.
Second half-ah Chencho-a'n talent a neih ṭhatzia a rawn pholang a, huaisen takin box chhungah la lutin minute 55-naah goal hnihna a khung.
Minute 79-naah Chencho leh Majcen ten wall pass hmangin tlarhnung an ṭhiat a, Juan Mera-a'n a tawp a khar. Churchill Brothers-in Martin Chaves hmangin siphurh sut ṭhen mah se Punjab club-in harsatna nei loin hnehna an chang.
Engtin zel?
RoundGlass Punjab-in March 4 hian Rajasthan United an hmachhawn ang a, league match hnuhnung berah Trau an hmachhawn leh dawn. Greek manager Staikos Vergetis kaihruai Punjab hian nomawi an hnaih ta hle.
Sreenidi Deccan erawh Moham-medan SC an hneh loh hnuah Aizawl FC lakah point khat chauh an hlawh chhuak a, champion beiseina nei chhunzawm turin March 5-a Real Kashmir an mikhual hunah hneh ngei a ngai ang. Chutihrualin Punjab-in Rajasthan an hneh a nih chuan inkhelh hmain champion beiseina a tawp dawn.
Kenkre an tla
I League aṭangin team pahnih an tla dawn. Nimin tlai khan Kenkre-in khan Real Kashmir 1-0 in an hneh lo a, Sudeva Delhi hnung zuiin an relegate.
Mumbai club Kenkre hian match hnih khelh tur la nei mah se an chunga awm Neroca chu point sariha an phak loh avangin an umpha thei tawh lo.