Quarterfinal-ah Djokovic a lut

Dubai Tennis Championship khelh laiah Novak Djokovic chuan quarterfinal a inhlangkai. Grand Slam vawi 22 champion tawh hian Tallon Griekspoor chu 6-2, 6-3 a hnehin last 16 a paltlang.

Nilaini zan inkhelah Djokovic hian hnehna chang turin darkar khat leh minute 21 bak hun a mamawh lo, quarterfinal-ah chuan Pavel Kotov hnehtu Poland tlangval Hubert Hurkacz nen an inhmachhawn leh dawn a ni.

Kum 35 mi Djokovic hian Australian Open nomawi a chawi hnua tournament a khelh lehna hmasa ber a ni a, malpui hliam vangin thla khat aia rei a chawl a ni. Dubai-ah hian a vawi ruk nan champion ngei a tum ang.

Serbian star Djokovic chuan, "Ka tan chuan zan duhawm tak a ni, ka match hmasa zawkah khan duhthusamin ka khel lo. Match hnihnaah erawh ka duh angin ka khel thei tawh," tiin a khelh danah a lungawi hle.

Inkhel dangah champion lai Andrey Rublev a vannei. Russian tlangval hian match point vawi nga ngawt a inchhanhim hnuah Alejandro Davidovich Fokina chu 1-6, 7-6 (8-6), 7-6 (7-3) in a hneh hram.

Rublev hian semifinal lut tur chuan Botic van de Zandschulp a hneh leh a ngai ang, inkhel dangah Zandschulp chuan Mikael Ymer chu 3-6, 6-3, 6-3 in a lo hneh ve thung a ni.