Durant hoin Phoenix Suns an chak

Kevin Durant chuan nimin zing khan a club thar Phoenix Suns tana a match hmasa ber a khel a, an khingpui Charlotte Hornets lakah point 23 neiin a team hi 105-91 in hnehna a chanpui.

NBA Most Valuable Player pawh ni tawh Durant hian Brooklyn Nets aṭangin Phoenix hi a zawm, a tirah a khup hliam vangin a inkhel nghal thei mai lo, hliam damkawr a la nih avangin minute 27 chhung chauh an la khelhtir.

Durant bakah hian Devin Booker chuan point 37 a nei a, regular season kal laia a vawi 34 nan an chak. Phoenix hi Western Conference table-ah palina an ni mek a, playoff khel turin an dinhmun a ṭha hle.

Kum 34 mi Durant chuan, "Basketball hi match 1000 deuh thaw ka khel tawh, tun ṭum match zet chu ka zam ve hle. Mahse, ka ṭhian ten ball min pe a, basket neih theihna remchang ka nei leh thei ta hi ka lawm," a ti.

Inkhel dangah Milwaukee Bucks tan Giannis Anteto-kounmpo chuan point 31 neiin Orlando Magic 139-117 in an hneh a, tun hnaiah match 16 chhung teh meuh hnehna an chang zawn ta.

Boston Celtics pawhin Cleveland Cavaliers chu 117-113 in an hneh, an chak theih nan an thiampuipa Jayson Tatum chuan point 41 a nei. Season hmasa NBA All Star Most Valuable Player hian champion pui tham a ni em tih fiahna a tawng chho mek zel.