Copa del Rey: Osasuna-in Bilbao an hneh

Spanish football-a inelna ngaihhlut hlawh Copa del Rey semifinal first leg-ah Osasuna an chak a, an mikhual Athletic Bilbao chu 1-0 in an hneh - an ke lehlamin final an rap ta, tiin a sawi theih.

Osasuna khelmual El Sadar stadium-a inkhelah Abde Ezzalzouli chuan inkhela goal awmchhun a khung a, Bilbao hian hun tawp thlenga a chhanletna an neih theih loh avangin an tlawm - second leg an nghakhlel tawh khawp ang!

Team pahnihin final luh ngei duhin atthlak taka innawr an tum lo a, tlarhnung lam an veng uluk dun hle. Osasuna chu chance hlauhawm nei hmasa zawk an ni a, mahse, Eze Abde chuan a chance neih a chhawr lo.

Mahse, Bilbao-in mikhual zakzum nih reng an tum bik lo a, khualmuala goal khung ngei tumin theihtawp an chhuah - Alex Berenguer chuan chance nei mah se Osasuna goalkeeper Sergio Herrera a paltlang thei lo a, Spanish keeper Herrera hian Iker Muniain chance neih a dang bawk.

Inaki Williams chuan goal-a khungah inngai mah se a offside avangin pawmsak a ni lo a, goal an khung thei lo. Second half ṭan aṭanga minute hnihnaah erawh thawnthu thlak danglamin a awm a, Osasuna-in goal an khung ta nge nge.

Osasuna hian counter-attack hmangin Bilbao an nawr let thut a, Barcelona aṭanga loan-a an hawh Abde chuan Bilbao defender a bum hnuah chiang zetin goal kil sirah a khung a, 1-0 a ni.

Bilbao-in goal an chhuah hnuah theihtawp chhuahin nawr let tum mah se, chance an nei hleithei lo a, hun pek belhah substitute Gorka Guruzeta chuan Bilbao tan si phurh sutna remchang nei mah se a chhawr thei lo - Osasuna an chak a, Copa del Rey final an mitthla ṭan ang.

Nizan khan Copa del Rey semifinal inkhel dangah Real Madrid leh Barcelona an intawng a, he thu buatsaih a nih lai hian result kan hre hman lo.