Santosh Trophy final khel tur Mizo rawlthar Tluangtea

Santosh Trophy semifinal chu March 1, Nilaini khan Saudi Arabia-ah khelh a ni a, Karnataka-in final thleng turin Services 3-1 in an hneh. Bawngkawn rawlthar F. Lalremtluanga'n Karnataka tan hmun pawimawh a chang.

Inkhel dangah Meghalaya-in Punjab 3-1 in an hneh bawk. March 4, Inrinni zan dar 6:00-ah Punjab leh Services ten pathumna an zawng ang a, Meghalaya leh Karnataka ten zan dar 9:00-ah nomawi an inchuh ang.

Mizoram an tel pha lo

Mizoramin kum 2014 khan coach H. Vanlalthlanga hoin Santosh Trophy nomawi an chawi a, hemi hnu hi chuan inelna awm apiangin rinkai an ni chho. Tun hnaiah erawh Mizoram an tla hniam a, Covid-19 hnuah kum zawnin final round an thleng pha lo.

Nikum khan Manipur-ah final round khel tur zawnna hi neih a ni a, Mizoram hian group match hnuhnung berah inelna thlengtu hi draw chauh mamawh mah se an hneh lo.

Tun ṭumah hian inelna kalphung an thlak hret a, zone anga khelh a ni tawh lo. NorthEast aṭang pawhin team pahnih aia tam tan final round khelh theih a ni a, chutihrualin final round-ah hian a 'nil' theih bawk.

Mizoram hi team ṭha zinga ngaih ni mah se Kerala lakah an mualpho a, final round an thleng pha lo. India hmarchhak aṭangin Manipur leh Meghalaya te an tling thung.

Mizo rawlthar

Semifinal leh final chin hi Saudi Arabia-a khelh a ni a, Mizoram erawhin final round khelhna hmun Odisha an thleng pha lo. Chutihrualin Karnataka tan Tluangtea hmun pawimawh a chang a, Mizo rawlthar hi Tata Trusts COE chhuak niin Bengaluru FC tan a khel mek.

Tluangtea hi qualifying round-ah khelh tlem deuh mah se a thawhrim rah a seng a, final round-ah hmun pawimawh changin match zawng zawngah bul a ṭan vek. King Fahd International Stadium, Riyadh-ah pawh Mizo tlangval hian a khel tluan a, stadium hi PSG leh Riyadh All-Star XI inkhelhna hmun kha a ni.

Bawngkawn rawlthar Tluangtea hi kum 2019-a neih Mizoram Under 15 League-ah khan best defender a ni a, hemi zawh hian India junior team camp-ah awmin kum 2020 khan Bengaluru FC hi a zawm.

COE tana a khelh laiin Tluangtea hi centre back-ah a awm a, India camp-a a awm aṭangin defensive midfield-ah awmin hemi positon-ah hian Karnataka tan pawh a khel a ni.