Liverpool an chak ve leh ta

Season ṭantira champion tum, season laihawla European football pawh beisei lo ṭan, February thla tawp lam aṭanga beiseina nei thar leh ta Liverpool chuan an beiseina an chhi nung zel - Nilaini zan khan Wolverhampton Wanderers chu 2-0 in an hneh.

Reds tan hian Virgil van Dijk leh Mohamed Salah te chuan goal khat ve ve an khung a, season thara Champions League beiseina an neih chu 'thil theih' a ni tih a lang nawn.

Liverpool hian Wolves an hneh avangin table-ah paruknaah an invawrh chho a, table-a palina dinhmun luah mektu Tottenham Hotspur chu point ruk chauhin an phak tawh lo - match khatin an khel tlem bawk.

Reds hian Pathianni zan dar 10:00-ah Premier League match khel turin Manchester United an mikhual zui dawn a, hmelma kumhlun mikhual hmaa hnehna chan hi an duhthusam a ni ngei ang.

Liverpool an vanduai

Anfield-a inkhel an ni bawk a, Liverpool-in chak ngei an duh a, an thawkrim hle. Mahse, Reds vanneih zan a ni lo em ni chu aw, tih tur a ni hman a, Harvey Elliott-a'n uiawm takin chance vawi hnih a hlah.

Reds tan goal khung a châk tawh thu sawitu Diogo Jota a hmuhnawm a, Wolves player hlui hi a club hlui lakah chak ngei tumin a thawkrim a, Liverpool player hmuhnawm pawl a ni.

Darwin Nunez sawi hmaih a thiang lo. Hliam vanga Crystal Palace laka a inlan theih loh hnuah Nunez-a'n Reds tlarhma a tinung sawt - a tlan tam a, a taima a, goal khung châkin a tuihal tih a hriat.

Mahse, Uruguayan striker hian goal hmahruai a khungah inngai mah se video assistant referee hmanga ennawn a ni a, box chhunga ball laluttu Jota chu Nelson Semedo lakah a foul nia a lan avangin referee-in a pawm lo.

A tawpah VVD

Liverpool hi Anfield-ah an chak zo lo a nih ngat chuan an dinhmun a chhe dawn - United an mikhual zui dawn avangin hmabak a ko a, season thara European football khelh phak loh a hlauhawm takzet.

Minute 73-na a inher chhuak a, Liverpool an vannei ta nge nge. Trent Alexander-Arnold-a freekick aṭanga ball kal chu Van Dijk chuan a dar hmangin a lo tauh a, Wolves keeper Jose Sa chuan ṭha zetin dang mah se a per.

A per lehlam hi VVD bawkin lo tauh lehin, goal-ah a chantir a, 1-0 a ni. Mahse, hei hi Liverpool tawpna a la ni lo - Reds keeper Alisson chuan fing takin Konstantinos Tsimikas hnenah ball a pe a, Greek defender hian a tlan luhpui hnuah Salah tan a siamsak.

Salah chuan Tsimikas duhsakna hi goal-ah chantirin, 2-0 a ni a, kum 30 mi Salah tan tun season-a goal 20 a khung tlinna chiah a ni - Wolves-in a chhanletna an nei lo a, Liverpool an chak.