Chak loh an hreh a, chak theih zel an inring - Ten Hag

Manchester United-in FA Cup quarterfinal lut turin West Ham an lehthal a, minute 89-naah 1-1 la ni mah se hun a tawp meuh chuan 3-1 in an chak. League Cup champion hlim Erik Ten Hag-a hote nomawi dang pathum chawi thei dinhmunah an la ding zel. Dutch manager-in an naute chuan inkhelh apianga chak theih zel an inrin thu a sawi chhuak.

Old Trafford-a inkhelah first half-ah goal a lut lo. Hammers-in Said Benrahma hmangin an khung hmasa a, amaherawhchu Nayef Aguerd-a'n an lamah a tauh luh avangin 1-1 a ni. Minute 90-naah Alejandro Garnacho-a'n hmahruaina goal a khung a, hun pek belhah Fred-a'n a khung leh bawk.

An indah ṭha

Man United-in kartawpah an hmelma Liverpool hmachhawn turin Anfield an tlawh dawn a, Erik Ten Hag-a'n first eleven a siksawi phah. League Cup final aṭangin Ten Hag-a'n bul ṭantu zingah player paruk ngawt a thlak.

Player pawimawh Raphael Varane, Lisandro Martinez, Fred, Casemiro leh Marcus Rashford te chu bench-ah dah an ni a, Luke Shaw erawh squad-ah a awm lo. Captain Harry Maguire, Victor Lindelof, Tyrell Malacia, Marcel Sabitzer, Scott McTominay leh Garnacho ten bul an ṭan.

David Moyes erawhin Nottingham Forest hnehtu aṭangin player pali thlak bawk mah se an ṭhat dan berin a remah a ngaih theih. Danny Ings chu Aston Villa tana League Cup a khelh tawh avangin a inlan thei lo a, Vladimir Coufal leh Lukasz Fabianski te pawh inhliam vanga inlan thei lo an ni. Jarrod Bowen erawh bench-ah dah a ni thung.

A goal lo

Inkhelh ṭan hmain League Cup nomawi chu Harry Maguire leh Bruno Fernandes ten an chawi chhuak a, Man United tana cleansheet ngah ber David De Gea an chawimawi bakah 2022 FIFA FIFPRO World 11-a lang pha Casemiro leh hmeichhe defender ṭha Lucy Bronze te an chawimawi bawk.

Old Trafford-ah inkhelh hmain lawmna tur ngah viau mah se inkhelah tak erawh lawmna tur a tam lo. Sabitzer-a ball pet ṭha zet chu Hammers keeper Alphonse Areola-a'n a dang a, Antony-a'n a hun ṭha neih goal zawnah a pet lo a, tlarhmaah mualneituin a hmawr bawk an harsat.

Hammers-in chance ṭha an nei hmasa zawk a, minute 23-naah Antonio-a'n goalkeeper De Gea chauh a hmachhawn hnuah a pet goal thei lo - Spanish keeper-in a ti ṭha ve bawk.

A goal ta

Second half-ah goal a lut a, mikhual team zawkin an khung. Minute 54-naah Emerson-a ball pek chu Benrahma-a'n goal kilah tak a dah a, goal mawi bik a ni. Chutihrualin goal luh hma hian United player-ten ball hi a 'out' hmanah an ngai a, an inthlahdah hman - VAR hmanga ennawn hnuah goal-ah pawm a ni.

Ten Hag-a'n chak a duh tih nemnghetin Martinez leh Rashford te a luhtir nghal a, second half ṭan chiahah Casemiro a luhtir bawk. Hammers zawkin goal hnihna an khung teuh a, Pablo Fornals-a'n goal pawnah chiah a pet bakah Antonio ball pet chu keeper De Gea-a'n a dang bawk.

Man United-in League Cup final-a an khung ang chiahin an thun a, Casemiro-a'n Fernandes-a freekick chu a tauh lut. Amaherawhchu VAR hmanga ennawn hnuah offside vangin pawm a ni lo.

Minute 77-naah United-in goal an khung ta tho a, Fernandes-a corner pet chu Aguerd-a'n an lamah a tauh lut - Hammers defender tihsual theih nan Weghorst-a'n a thawh hlawk hle.

Mualneitu an phur zui a, ding lam aṭanga Fernandes-a ball vawrh chu Garnacho chuan pet nuam tawk chiaha ti perin ṭha zetin a pet goal. Minute 90-na a nih avangin United an chak dawn tih a hriat theih a, Old Trafford-ah 'star' thar a awm dawn tih rinhlelh rual a ni ta lo.

Man United-in an duh tawk lo a, Weghorst thawhrim zarah Hammers tlarhnungin tihsual phahin ball per chu Fred-a'n chak nemngheh nan a khung.