Spurs nomawi beiseina a tawp

Harry Kane-a'n nomawi a chawi rih dawn lo. Tottenham Hotspur hian Nilaini zan khan FA Cup fifth round-ah Sheffield United an lenchilh a, Championship club hian Spurs hi 1-0 in an hneh.

Tottenham hian Kane hi bench-ah an dah a, chutihrualin tlarhmaah pound maktaduai 60 man Richarlison leh Son Heung-min te an awm tho avangin goal khungah buaina tur awmin a lang lo.

Mahse, Bramall Lane-ah Spurs goal bawh a na tawk lo a, second half-ah Kane leh Dejan Kulusevski te luhtir mah se danglamna an thlen thei lo. Blades tana bench aṭanga rawn lut Iliman Ndiaye a langsar ta ber a, Senegalese midfielder hian Spurs tlarhnung a bum hnuah minute 79-naah ṭha zetin chakna goal a khung.

Tottenham assistant manager chuan inkhelh banah bench-a Kane a dah chu a inchhir loh thu a sawi a, amaherawhchu a pawi tur ang a pawi zo tawh. Spurs tan tun season-a nomawi chawi theihna chu Champions League chauh a ni tawh a, amaherawhchu Europe inelna sang bera champion erawh tun dinhmunah chuan an hlat hle.