European football a lo kir leh ta Dortmund leh Haaland thiamna a la pangngai
Manchester United leh Liverpool inkhel a ni lo a, Arsenal leh Tottenham inhmachhawn lah a ni hek lo. Mahse, live ngeiin football en tur a awm leh ta! European league lian panga zinga a hmasa ber ni turin Bundesliga chu thla hnih hnuah an khel chhunzawm.
Inrinni zan khan inkhel panga a awm, inkhel ngaihven hlawh berah Borussia Dortmund leh Schalke 04 ten 'Ruhr derby' an khel; Dortmund lamin nuam sa takin 4-0 in hnehna an chang.
Dortmund-in hmahruaitu Bayern Munich an phak lohna chu point khat chiah a ni, nizana Bayern inkhel result a zirin an inkar a la danglam leh thei.
Haaland a la pangngai
Signal Iduna Park-ah fans an awm lo a, stadium ruakah Dortmund chuan Schalke an lo mikhual. Inkhel ṭan hmain Erling Braut Haaland chuan Ruhr derby khelh a nghahhlelh thu a sawi, a sawi ang ngeiin khelmual chungah a phur tih a hriat.
Minute 29-naah Haaland chuan Thorgan Hazard siamsak chu goalkeeper Markus Schubert dan hman lohin a khung; Bundesliga match kua a khelh aṭangin goal 10 a khung tling der! Dortmund lamin inkhel an thunun zui a, Raphael Guerreiro (45', 63') leh Hazard (48') ten khung belhin an chak nuam sa.
Chawlh kar 10 deuh thaw an chawlh hnuah pawh Dortmund an la thiam reng. Hliam dam hlim England forward Jadon Sancho chu hun tawp dawnah luhtir a ni chauh a, hliam vangin captain Marco Reus inlan lo mah se goal hmaah an buai lo.
Stadium a ruak
Covid-19 len hma kha chuan Signal Iduna Park-ah inkhel a awm a nih chuan entu an tam ṭhin a, fans 80,000 chuang an pungkhawm ṭhin. Tun ṭumah erawh hri leng vangin fans an awm lo, player in au thawm a ring a, ball an pet ri leh hamrik ri mai lo chu thawm dang a tam lo.
German Football Association (DFB) dan siam chu a theih anga zawm a ni. Goal an khung pawhin player-te chu inhawr khawm lo tur leh, kutphah inbensak (high five) ti lo tura tih an ni. Dortmund player-ten goal an khung pawhin inhlat deuh taka ding chungin an lawmna an lantir.
University of Brighton-a sports lam zirbinga neitu Dr Mark Doidge chuan, "Zan lam intih hlimna hmuna rimawi tel lo ang vel a ni, phurna leh zauthauna tel lo chuan infiamna hi engmah lo mai a ni," tiin a hmuna entu awm loa inkhel chu a khawharthlak zia a sawi.
Inkhel dang
Champion beisei ngam zinga mi RB Leipzig chu hri len hnua an match hmasa berah an chak zo lo, an mikhual Freiburg nen 1-1 in an inhnehtawk. Mikhual lam tan Manuel Dulde chuan corner aṭanga ball kal chu minute 34-naah a khung.
Striker ṭha Timo Werner awmna Leipzig lamin sut turin minute 77-na an nghah thlen a ngai a, goal khung tuma vawi 15 an pet hnuah Yussuf Poulsen-a'n a sut hram, hun tawp hma deuhin Freiburg lamin Robin Koch hmangin khung leh mah se offside vanga pawm a ni lo.
Mizorama inkhel tawh Hoffenheim chu an mikhual Hertha Berlin lakah 3-0 in an tlawm. Season kal laiah Bayern Munich, Dortmund leh Bayer Leverkusen te hneh thei mah se an khelh fuh leh fuh loh ni an inthlauh em avangin Hoffenheim tan season thar European football khelh beiseina a tlem.
Chawlh kar sarih chhung inkhel loin kan awm a ni a, khami chhung khan thil tam tak a danglam hman. Mahse, kan chawlh chhung khan ka theihtawpin ka thawkrim a, goal ka khung leh nghal hi mak ka ti lo.
- Erling Haaland, Dortmund striker
Si li faia Schalke hneh chu result ṭha tak a ni. Thawhhona ṭha tak neiin kan khel a, chumi rah chu kan seng. Goal khung tuma kan pet lai te, kan chet fuh leh chetsual deuh laiin thawm a reh vek, fans awm loa inkhelh chu a khawhar thlak takzet.
- Lucien Favre, Dortmund coach
Ruahmanna kan nei a, mahse hun chanve hmalam khan chu ruahman ang chuan kan khel thei lo. Dortmund midfielder Thomas Delaney khan kan hna thawh tur min tihtawpsak zel, goal chhuah tawh hnua thawh leh chu a harsa.
- Daniel Caligiuri, Schalke captain
Dan zawm tur a tam!
Hripui coronavris vangin March thla chawhnu lam aṭangin European football an khel tawh lo. German Football Association (DFB) chuan league an khelh chhunzawm leh ngei theih nan sorkarah dan an siam thar an tehlut a, an dan siam hi hri laka an him theih nana tih a ni.
Dan an zawm vang hian hri an kai dawn lo ngei ngei tihna a ni chuang lo. Amaherawhchu, footballer-te hi midangte ngaihsan leh entawn an ni a, mipui hmuh laia dan zawm leh entawn tura awm chu an tih makmawh a ni.
Ball an tifai
Inkhel pakhat atan ball 30 hman a ni a, a khat tawkin ball boy-ten an ti thianghlim ṭhin. Ball hi player an pe chhawng mai lo a, a dahna tur hmun siamsak laiah dahin player ten an lachhawng mai ṭhin. Ball boy atan hian kum 16 chin chauh hman an ni, anni pawhin a khat tawkin an kut an tifai ṭhin.
Journalist 10 chauh
Bundesliga match pakhata mihring inhnamhnawih zawng zawng chu 300 bawr vel chauh tur an ni a, an zinga 10 chu journalist an ni. Thuthar thehdarhtute pawhin hmai tuamna (mask) vuah chungin inhlat deuh taka ṭhuttir an ni.
Mask an vuah
Khelmuala inkhel lai ni lo, stadium chhunga lut ve dang zawng zawng chu hmai tuamna (mask) vuahtir vek an ni. Substitute leh coach-te pawhin an hmai an tuam a ngai, inhnaihchilh lohin, inkar hlat deuh taka ṭhuttir vek an ni bawk.
South Stand chu
Mipui 82,000 chuang lenna Signal Iduna Park chi German rama stadium lian ber a ni, stadium chhunga mi 25,000 awm theihna 'South Stand' chu Europe stadium zingah pawh ding chunga fans an awm tam theih berna hmun a ni. Kawr eng ha an ding khat thlat ṭhin; 'Yellow Wall' chu hmun ruak mai a ni rih.
Inchibai an phal lo
Kuta inchibai phal a ni lo a, inkhelh hma in chibai leh goal lawm avanga inchibai pawh a awm lo. In chibai ai hian kiu (elbow) insiktir zauh leh, ke lama lawmna lantir erawh phal a ni thung.
Media leh player
Tun hma lama press conference an neih ṭhin ang kha a awm lo. Media lamin player an be dawn a nih pawhin inhlat deuh tak aṭangin zawhna an zawh a ngai a, chanchinthar thehdarhtu pawh thlan bik chauh an awm thei.