A Licence coach thar Dika

Football coach K. Lalrindika chuan AFC A Licence a nei thar a, Mizo zinga pahnihna niin Danny Lalduhawma zawha AFC A Licence nei leh thei hmasa ber a ni.

Mission Vengthlanga cheng Dika hi a inkhelh hun laiin midfielder a ni a, rualpui zinga theihna nei sang bik ni mah se inkhelh hi eizawn nan a hmang lo.

Dika hian football erawh a kalsan lo a, a khelh a chawlhsan hnuah coaching lamah a lut hma thung. Kum 2008 khan Dalhousie Public School, Punjab-ah head coach hna a thawk a, kum 2015 thleng a thawh hnuin India rama Arsenal Football Academy-ah assistant coach hna 2015-2018 chhung khan a thawk.

Total Football India (TTFI)-ah Dika hian kum 2018-19 chhung khan head coach hna a chelh leh a, hemi zawh hian Badhani Football Academy (2019-20)-ah head coach hna bawk a chelh.

Kum 2021 khan Diphu, Assam club Karbi Anglong Morning Star a enkawl a, 5th CEM Gold Cup-ah a champion pui.

Kum 2022 aṭang khan Reliance Young Champs Mumbai-ah coach hna a zawm a, tunah hian Reliance -MFA project ah hian head coach hna a chelh mek.

Tun ṭum AFC A Licence course hi Mumbai-a neih a ni a, India head coach hlui Savio Medeira chu instructor niin mi 25 course hmachhawn zingah India national team assistant coach Mahesh Gawli leh Mohun Bagan legend Jose Barreto te chu a langsar an ni a, an batchmate dang hi ISL leh I League-a coach hna chelh mekte an ni.

Course hi ṭum thum (module thum) neih a ni a, October 2022 aṭanga February 2023 thleng a ni. Nimin khan result a chhuak a, Dika hlawhtlina hi Mizoram football tan thil lawmawm a tling.