Pathianni zanah Formula 1 an tlan ṭan leh dawn

Khawvela car intlansiakna sang leh ngaihhlut ber Formula 1 chu Pathianni zan dar 8:00 hian an tlan ṭan dawn, Bahrain International Circuit-ah Bahrain Grand Prix an tlan ang. Driver champion lai Max Verstappen chuan Red Bull car a ringtawk tih a sawi.

Kar hmasa khan inenchhinna hun hman a ni a, tlan chhin hnuhnung berah Red Bull driver pakhat zawk Sergio Perez a tlan chak ber, a hnungah Mercedes driver Lewis Hamilton a thleng thung - inelna a hmuhnawm dawn tih a chiang.

Max a inringtawk

Tun hnai season hnih chhung Max Verstappen a champion, season kan hman liam takah phei chuan amah elphaktu a nei lo - fal leh nuamsa takin a champion. Kuminah pawh hian a chesual viau a nih loh chuan a vawi thum nan title la tura rinkai a ni.

Red Bull driver Verstappen chuan, "Thil thar enchhin duh kan nei nual a, car chak leh ṭha zawk neih tumin hma kan la bawk, tlan chhinna kan neih aṭang chuan kan ruahmanna te pawh a hlawhtling viauin ka hria.

"Team thawhhona a ṭha a, eng pawh hmachhawn turin kan inpeih leh tawh hle. Kan thlen chinah kan lawm hle bawk," tiin a sawi a, F1 champion a nih hmasak bera a sawi ang khan Red Bull team chungah rinna a nghat pumhlum ngam.

Dutch tlangval hian season hmasa khan intlansiak 14 zetah hnehna a chang a, legend Michael Schumacher-a'n record a lo siam tawh vawi 13 chak chu a khum - F1 season awp hneh ber tia sawi pawh an awm hial, kuminah chhunzawm leh a tum ang.

Intlansiak 23

Tun season hian intlansiak 23 a awm dawn. Season hmasa lama Verstappen elpui ber Ferrari driver Charles Leclerc chuan, "Nikum aiin intlansiak a tam zawk dawn avangin hna kan neih belh dawn tihna a ni a, kan buai phah ka ring lo," a ti.

Nikum khan intlansiak 22 a awm a, heng zinga paliah Ferrari hian hnehna an chang. Leclerc-a'n vawi thum hnehna a chang a, a teammate Carlos Sainz Jr. chuan vawi khat hnehna a chang ve bawk - Red Bull el phak tur chuan hmasawn an mamawh hle.

Italian team hlun, car intlansiakna sanga team ṭha ber ang hiala sawi ngam ni ṭhin Ferrari hian Mercedes leh Red Bull an tluk lohna a rei ta. Tun hma lama an ropuina ang kha neih let leh an duh a nih chuan a tir aṭanga chet fuh nghal a ngai dawn.

Ferrari team principal thar Frederic Vasseur chuan, "Thawhhona ṭha leh inpumkhatna tel lo chuan a hlawhtlin theih loh, chuvangin team kan nihna kan hriat a ngai. F1 huangah chuan second khat lek hlutna pawh nitin kan hriat thar a ngai," a ti.

Lewis hma hun?

Lewis Hamilton hian Formula 1 title vawi sarih a la tawh, champion hnem ber Michael Schumacher nen an champion tam zat a inang. British tlangval hian mimal record ṭha bik nei turin vawi khat champion a la mamawh.

Hamilton hi kum 38 mi a ni tawh a, a vanglai a pel tawh. Season hmasa khan Marcedes chuan Red Bull angin car an neih chak tawk loh thu a sawi zauh a, tun season atan a duhthusam ang car an siamsak thei em tih chu kan hre thuai dawn.

Season thar inbuatsaihna an neih dan thlir chuan Hamilton tan champion a beisei ngam. Chutih rualin nikum anga a bul a ṭan fuh lo leh a nih chuan thawh chhuah a harsa leh mai thei, chuvangin atan vawi nga a chak tawhna hmunah hnehna chan a pawimawh ang.

Nikum Bahrain Grand Prix-ah khan Charles Leclerc a chak berah, a hnungah a teammate Carlos Sainz Jr. a thleng - pathumna chu Hamilton a ni. Hamilton hian 2014, 2015, 2019, 2020 leh 2021 khan Bahrain-ah hian hnehna a lo chang tawh, record nei ṭha ber a ni.