Bagan khelmualah beiseina nen Odisha an leng dawn

Indian Super League knockout match pawimawhah Odisha chuan zanin dar 7:30 hian ATK Mohun Bagan an lenchilh dawn a, a vawi khat nana playoff inpetkai Odisha hian Kolkata khawpuiah chak an tum ngam.

ATK Mohun Bagan-in sum an ngah a, an mit châk zawng chu an hlah lo - an duh ang player an lei a, an duh ang coach an lalut a, an sum an ren lo hle. An sum sen zat ngaihtuah chuan league winner nih phu an ni a, mahse, pathumna dinhmun luah chungin playoff hi an inpetkai ve hram.

Kolkata club hi league match 20 an khelhah vawi ruk ngawt an tlawm - an sum sen zat nena ngaihtuah chuan thil awm lo tak niin a lang a, zaninah an tlawm a nih ngat chuan an tan mualphona tawpkhawk a ni ang.

Hetiang boruak karah hian Odisha chuan thilmak thlentir tumin, Bagan khelmualah hnehna chan an tum dawn a, zanin inkhel hi a hmuhnawm loh ring suh.

Bagan an ṭha

Mohun Bagan squad en ila, an ṭha ṭhe ṭhaw hle - si ban nghak turin Vishal Kaith an nei a, a hmaa ding turin Australian defender Brendan Hamill, Pritam Kotal, Subhasish Bose, Sumit Rathi leh Asish Rai te ho an awm bawk avangin a thlamuanthlak hle.

Midfield-ah Motherwell captain hlui Carl McHugh, nuai 200 chuang man Hugo Boumous leh Ashique Kuruniyan te ho an awm a, January transfer-ah khan midfield thuam ṭhat nan K. Lalṭhathanga (Puitea) chu Kerala Blasters aṭangin an la lalut cheu bawk.

Tlarhma en ila, match 17 aṭanga goal kua leh assist vawi sarih nei tawh Dimitri Petratos a rintlak a, kum 30 mi forward hi Australia tan pawha lo inlan tawh a nih avangin a chhe lo.

Petratos bakah hian Indian forward Liston Colaco leh Manvir Singh te hi an khelh ṭhat ni chuan dan harsa tak an ni a, Odisha tan hmun awl siamsak loh chu thutlukna finthlak ber a ni ang.

Odisha lam hi

League round-a an match hnuhnung berah Odisha-in tlang turin hnehna chan an mamawh a, mahse, season hmang ṭha lo tak Jamshedpur lakah 2-0 in an tlawm a, an mualpho.

Mahse, Odisha an vannei a, an elpui FC Goa an tlawm ve leh avangin playoff khel turin an inpetkai - Bagan lakah meuh hnehna chang tur chuan insiamṭhat an mamawh a, team thawhhona ṭha an mamawh.

Isak Vanlalruatfela'n league tawp lamah a hming a chher a, mahse, Thingsulthliah forward hi a khua a sik avangin a inlan theih dawn leh dawn loh a chiang lo a, Jerry Mawihmingthanga leh Isaac Vanmalsawma ten he thu buatsaih a nih lai hian harsatna an la nei rih lo.

Tlarhmaah goal 12 khung tawh Diego Mauricio-a'n mawhphurhna a lak ngam a ṭul a, midfielder Saul Crespo chet ṭhat a ṭul a, tlarhnungah Spanish defender Carlos Delgado a khelh ṭhat a ṭul bawk ang.