Semifinal-ah Djokovic a lut

Novak Djokovic chuan season bul a ṭan fuh a la chhawm nung zel. Ningani zan khan Dubai Tennis Championship-ah Hubert Hurkacz hnehin semifinal a inhlang kai, nomawi chawi turin match hnih chak a la hmabak.

Kum 35 mi Djokovic hian kuminah match 15 a khel tawh a, a la chak fai vek. Quarterfinal inkhelah pawh hian harsatna a tawk lo, darkar khat leh minute 11 chhung lekin a khingpui Poland tlangval Hurkacz chu 6-3, 7-5 in a hneh.

Serbian star Novak chuan, "Kan service ṭha pangngai ka neih theih hi chuan kawng a awlsam phah ṭhin. Ball vaw na lah thahrui ngah tak laka ka khelh chhuah theih dan hian min ti lawm hle," tiin a sawi.

Djokovic hmabak erawh awlsam tak a ni dawn lo, nizan khan Daniil Medvedev nen an intawng zui a, result kan hre hman lo. Australian Open finalist Medvedev hian Borna Coric chu 6-3, 6-2 in a lo hneh ve thung a ni.

Champion lai Andrey Rublev pawh a la kal zel. Russian tlangval hian Botic van de Zandschulp chu 6-3, 7-6 (7-3) in a hneh, ani hian Alexander Zverev a hmachhawn ve leh thung ang.