Arsenal leh Man City inlan hun

Premier League champion tum inum boruak a sang a, vawi khat lek chetsual pawhin nghawng na tak a la nei thei zel. Zanin dar 6:00 hian champion lai Manchester City chuan Newcastle United an mikhual ang.

Man City inkhel result hre sa chungin Arsenal chu dar 8:30-ah Bournemouth nen an inkhel chhunzawm ve thung dawn. Gunners leh Man City inthlauhna hi point nga chauh a la ni a, khelh hmabak an la ngah avangin inlehthal thei reng an la ni.

Haaland awmna

Pep Guardiola-a'n tun hnaiah squad siksawi fo mah se hnehna an chang zel a, player ṭha an neih tam avang tak hian season chawhnu lamah an tlo ṭhin - player siksawi kara khel reng bik chu Erling Haaland a ni thung.

Norway international hi a dam a nih chuan Premier League inkhel bul ṭan tura thlan a ni zel. Tun season league goal 27 khung tawhtu hi Kieran Trippier leh a ṭhianten lo dan an tum dawn.

Magpies tlarhnung hi awlsam taka paldarh theih ngawt chu an ni dawn lo. Eddie Howe-a naute hi tun season kal laia goal chhuah tlem ber (15) an ni, chutih rualin City hi goal khung hnem ber (64) an ni thung - goal ven thiam leh a khung thiam inkhel hi a hmuhnawm ang.

Arsenal ve thung

Tun lai Premier League team zinga boruak ṭha ber thlang dawn ila Arsenal hi a buk rit ber an nih loh chuan, a rit berte zinga mi an ni ngei ang. Player malkhaia ṭha leh chhuan bik tur nei hran lo mah se thawhhona ṭha chu an chakpui ṭhin.

Kar hmasa khan Gabriel Jesus-a'n training zawm tawh mah se Bournemouth lakah an chhawr a la rinawm loh. Jesus awm lo mah se tun hnaiah Bukayo Saka leh Gabriel Martinelli ten goal khung an harsat lo, zainah pawh mamawh chhanna an nih theih a rinawm.

Emile Smich Rowe a dam tawh, ani hi Leicester City lakah pawh a inkhel thei tawh. Tlarhma lamah Eddie Nketiah leh Leandro Trossard an la nei bawk, an khingpui tur hi tun season kal laia goal chhuah hne ber (48) an nih avangin goal khung an huphurh lo ang.