Inrintawkna nen ka lo kir - Ibra

Zlatan Ibrahimovic chuan hliam vanga hun rei tak chhung inkhelh theih loh chu hrehawm a ti hle a, tunah chuan inrintawkna sang tak nen AC Milan tan a lo kir leh ta tih a sawi.

Serie A champion lai Milan hian kar hmasa khan Atalanta chu 2-0 in an hneh, he inkhelah hian hun tawp dawn lamah Ibra chu khelmual chhungah a rawn lut, zanin dar 1:15-a Fiorentina nen an inkhelh hunah pawh a inlan ngei a rinawm.

Kum 41 mi Ibra chuan, "A nihna takah chuan inkhel mumal loa ka awm chhung kha kum khat leh a chanve a tling, chumi hnua ka inkhel leh thei ta mai hi a lawmawm takzet.

"Hliam vanga chawlh reng mai chuan rilru pawh a nghawng, mahse tunah chuan inrintawkna ka nei leh tawh, he inrintawkna hi keimah chauh ni loin player dang tan pawh ka hlan chhawng ang," a ti.

Milan tan Serie A title humhim beisei ngam a ni tawh lo, chutih rualin season thara Champions League khel tur chuan thapui an thawh a ngai thung - zaninah pawh khualmual aṭanga point thum hmuh ngei an tum ang.