Real aiin Barca dinhmun a ṭha hret

Copa del Rey semi-final first leg-ah Barcelona-in Real Madrid 1-0 in an hneh a, Santiago Bernabeu-a goal awmchhun hi Brazilian defender Eder Militao-a'n an lama a tihluh a ni.

Catalan club-in Manchester United (Europa League) leh Almeria (La Liga) an hneh loh hnuah hnehna an chang a, an hneh hi an hmelma Real Madrid a nih bawk avangin an phur thar khawp ang.

Real Madrid erawh an vanduai, goal awmchhun luh dan hi ho hle. Barca midfielder Franck Kessie ball pet chu Thibaut Courtois-a'n dang mah se Militao-a'n an lamah su a, Nacho-a'n a pet ṭhelh leh bawk.

Xavi-a'n tlarhnung a rem phui ṭha a, Real Madrid hian na takin nawr mah se German keeper Andre Ter Stegen-a'n an paltlang zo lo. Second leg hi April 5, Nilaini zan hian Nou Camp-ah khelh a ni dawn a, Carlo Ancelotti hoten beisei tur a la nei ang.