Anfield-ah League Cup champion an leng lût dawn
English football-a club ropui leh inhal pahnih Liverpool leh Manchester United te chu March 5, Pathianni zan dar 10:00 hian Anfield-ah an inkhel dawn. Erik ten Hag-a hote hi League Cup champion an ni a, an phur vanglai tak ni mah se an khingpui tur hi Jurgen Klopp-a kaihhruai Reds an ni tlat - a hmuhnawm dawn.
A va mak em!
Khawvelah hian engmah kumhlun tur a awm lo a, mit khap kar loah thil a danglam ṭhin. Hei hi Liverpool leh Man United aṭanga teh pawhin a dik tih a chiang a ni. Nikum April thla khan Man United-in Anfield an tlawh a, Klopp-a hote hian 4-0 in an sawp.
'Liverpool-in Man United inkhelh an zirtir' tih chu Vanglaini headline a ni. Red Devils-in parukna ni chungin season an khar a, coach atan Ajax thluak bur Erik ten Hag an lalut zui.
Dutch manager Ten Hag hoin Man United-in nikum August khan Liverpool hi an mikhual a, Old Trafford-ah mualneituin thla li lek liam taa football zirtirtu chu 2-1 in an hneh let. Kum khat em pawh a vei hmain Man United-in Liverpool kawl lai League Cup chu laksak bawk. Thil awm dan a inthlak chiang hle.
Mahse maw!
Ten Hag-a hnathawh ṭhat zarah Man United buk a rit ta zawk a, mahse a inkhelhna tur hi Anfield a ni tlat. Klopp-a hote hian kar laihawl khan Wolves 2-0 in an hneh a, goal nen Virgil van Dijk a rawn kir a, Mohamed Salah-a'n goal khung dan a la thiam reng bawk.
German manager Klopp-a'n tlarhmaah duhthlan tur player a nei leh tawh. Wolves lakah hian Salah, Diogo Jota leh Darwin Nunez ten bul an ṭan a, bench aṭangin Roberto Firmino leh Cody Gakpo-te an lut.
Reds tan champion beisei a har tawh a, chutihrualin Champions League khelh erawh a la beiseiawm hle. Zanin inkhel dangah Man City-in Newcastle United an hneh a nih phei chuan Klopp-a hote hian Man United hnehin a sang panga zingah an awm dawn a, match 13 khelh tur a la awm dawn bawk avangin UCL khelpha china awm pawh thil huphurhawm a ni lo ang - Liverpool tho kha an la ni miau a.
Liverpool manager Klopp chuan, "Keini aiin season an hmang ṭha zawk a, kan vanneihna tak erawh an chet ṭhat avang hian tun ṭuma kan inkhelh turah hamṭhatna an neih phah lo. Tum kan nei a, kan tum kan hlawhtling a nih chuan phurna nasa tak min pe ang.
"Hmachhawn kan harsa a ni tih kan lantir a ṭul. Tun season ṭantira kan hneh loh khan khelh an harsa a, tun ṭumah hian khelh kan awlsam loin hmachhawn kan harsa tih kan lantir ve a ṭul a ni," tiin an hmelma lakah point hlawhchhuah ngei a tum.
Man 'United'
Manchester United hian hun rei tak chhung an hming an pu zo lo a, khelmual chhung leh pawnah 'United' lohna hmuh tur a ṭhahnem hle. Tunah erawh theihna sang leh hlawh sang, khelmual chhunga thawh hlawk si lo Paul Pogba leh Cristiano Ronaldo te an awm tawh lo a, team angin an khel leh tawh.
An khel ṭhatlang tih nemnghettu chu position tinah player fak tur an awm a, phunchiar deuh tan lo chuan player mala sawisel tur a tlem ta pharh. Football khelh dan hmang chik zawkten Casemiro bakah goal thun lo chunga Wout Weghorst thawh hlawkzia an sawi a, football en ṭhin tan Bruno Fernandes pawimawhna hmuh fuh a harsa lo.
Marcus Rashford chet ṭhatzia phei chu football chinchang hre ve deuh chuan an hre vek. Mahse, he Man United 'thar' tak hi Liverpoolin hneh an châk chu a ni a, Klopp-a'n a tan a ropuina hliah khuh theitu Ten Hag-a hote hneh hi a pawimawh em em a ni.