King Fahd International Stadium-ah Tluangtea

Santosh Trophy final chu zanin dar 9:00 hian Meghalaya leh Karnataka ten King Fahd International Stadium, Riyadh-ah an khel dawn. Karnataka-ah hian Mizo rawlthar F. Lalremtluanga chu player pawimawh a ni.

India rama state leh state inelna sang ber Santosh Trophy hi kuminah inelna kalphung an thlak a, semifinal aṭangin Saudi Arabia-ah an khel. January thla khan King Fahd International Stadium-ah hian PSG leh Riyadh All-Stars XI te an inhmachhawn.

Khawvel player ṭha Cristiano Ronaldo, Lionel Messi, Neymar leh Kylian Mbappe te inkhelhna hmunah Mizo rawlthar a inkhel dawn tihna a ni a, a ropui hle. Chutihrualin Mizoram team hi Saudi Arabia an zin phak lo a, inenfiah a ṭul hle.

Bawngkawn rawlthar Tluangtea chuan, "Ronaldo, Messi, Neymar leh Mbappe te inkhelhna ground-a inkhelh ve ringawt pawh kha ka tan chuan a hlu a ni," tiin Vanglaini a hrilh.

Tluangtea hi Tata Trusts COE aṭanga inzir chhuak a ni a, kum 2020 aṭang khan Benglauru FC a zawm. Karnataka-ah Mizo rawlthar hian hmun pawimawh a chang a, final round chinah bul a ṭan vek.

Karnataka hian nomawi an chawi a nih chuan a vawi nga nan an champion dawn tihna a ni a, Meghalaya erawh an vawi khat final luhna a ni.

Santosh Trophy final en tur hian AIFF-in state FA tin aṭangin mi pakhat ṭheuh a sawm a, MFA executive committee member K Lalenghluna a kal.