Champion Zia chhuahtu Arsenal

A bul ṭan dan ai chuan, a tawp khar dan a pawimawh zawk - Arsenal hian 'Champion Zia' an nei tlat! Premier League hmahruaitu Gunners chuan hun tawp dawna Reiss Nelson goal hmangin Bournemouth 3-2 in an hneh.

Inrinni zan tirah champion lai Manchester City chuan Newcastle United 2-0 in an hneh a, hmahruaitu Arsenal nen an inkar chu point hnih lekah an sawr zim. Mahse, Citizens inkhel hnuah Gunners an chak zui ve leh a, point ngaiin an sang fal leh ta.

An che hman lo

Emirates Stadium-a an luh hmain Bournemouth coach Gary O'Neil-a'n ruahmanna fel tak a nei sa, a bul ṭantu an nih chuan tih dan tur an zir uluk hle tih a lang bawk, an zir ang chiahin an che chhuak thei bawk a ni.

Mual laiah Joe Rothwell-a'n ball thaiin a sir lama awm Dango Ouattara tan a pe, a ni hian Oleksandr Zinchenko awmna lam sirah la lutin, box chhungah a cross pei - Dominic Solanke chuan Gabriel a lo tlan bum sak.

A hnunga rawn put chuak Philip Billing chu William Saliba-a'n a veng hman lo, inkhel ṭan aṭanga second 9.11 lekah Billing chuan keeper Aaron Ramsdale dan theih lohin goal hmahruai a khung der - Arsenal lamin ball pawh an khawih ve hman lo!

Billing-a goal hi Premier League bika goal lut rang pahnihna a ni hial, a tluk loh chu second 7.69 leka Southampton player Shane Long khung kha a ni, ani hian kum 2019 April thla khan Watford lakah EPL goal rang ber a khung.

Ruahmanna fuh

Gary O'Neil ruahmanna a fuh chhunzawm zel, minute khatna lekah goal an khung a, minute hnihna aṭang chuan anmahni goal venhim chu an hnapui a ni chhunzawm. Goal khung belh ai chuan neih sa hum tumin thapui an thawh.

Bukayo Saka leh Gabriel Martinelli te hi hmun awl pek zau chi an ni lo tih an hria, anmahni box bul hnaiah an intlar ṭhup a, player tlanchak tan hmun an siamsak duh lo - counter attack aṭangin an vaw let zauh bawk, keeper Ramsdale che ṭha lo se chuan an khung belh ang.

English keeper Ramsdale hian hnai zetah Dango Ouattara khung tur chu a dansak. First half chhung Bournemouth an inveng tluan thei, ball chang tlem mah se goal an venhim tlat avangin point hmuh beiseina pawh a lian viau.

Second half tirah O'Neil-a naute bawk an che fuh, corner aṭanga ball kal lai chu Marco Senesi-a'n a tauh lut zawt, amah vengtu Thomas Partey kha Arsenal player lam chuan an sawisel nasa hman viauin a rinawm, ball kang a chuh na tawk lo. Gunners vanduaina belhchhah turin referee duhsakna an dawng lo, penalty ṭum li an beisei - an beiseina a thlawn vek.

Thawhlehna

Hliam vangin Gabriel Jesus leh Eddie Nketiah an chhawr thei lo a, a bul ṭantu Leandro Trossard a hliam leh bawk. Jorginho leh Granit Xhaka te hahchawlh tira Fábio Vieira bul ṭan tirtu Mikel Arteta kha dem rawn tur ni ngeiin a lang, tlak hlau lakah 2-0 in an hniam si.

Takehiro Tomiyasu thlaktu Ben White-a'n inkhel a ti kang hret, forward Trossard thlaktu Emile Smith Rowe chuan Partey goal khung tur a siamsak - Partey hian lirnghing vanga thi ta Christian Atsu tan a goal khung a hlan, mahse si phurh sut tur an la nei a, hun a hmang mumal thei lo.

Arteta-a'n thu tlukna dik a siam - tun season EPL minute 64 chauh la khel Nelson a luhtir. Malpui hliam vanga buai reng Nelson luh chinah Arsenal goal nawr a hlauhawm zual, mual sir aṭangin Ben White goal khung tur a rawn siamsak.

Kum 23 mi Reiss Nelson hian a la duhtawk mai lo, hamrik hnuhnung ber a rik hma chiahin corner aṭanga ball kal zel chu goal kilah a khung! Emirates Stadium chhung boruak chu a sukin a su dup dup - mikhual tan thawhlehna hman a awm tawh lo.

A tawp
Goal
kha...!

Premier League goal rang pahnihna an chhuah a, a tawpah erawh Arsenal lamin tun hnai season 17 chhunga EPL goal an khung tlai ber dawt hmangin hnehna an chang let ve leh ta thung.

Hun pek belh kha minute ruk a ni a, goal hnuhnung ber a luh khan minute 96 leh second 57 a ni. Alexis Sanchez-a'n 2017 January thla khan Burnley lakah 97:14-ah goal a lo khung tawh, hei hi an khung tlai ber a ni.

England ram football thuneitu sang FA dan leh hraia a inziah dan chuan, "Additional time hi fourth official-in a pek a ni a, minute an khelh tlin ngei ngei tura a tlem thei ang ber a ni. Minute pek belh hi khelh tlin ngei tur a ni a, referee in a hmain a ti tawp thei lo, a ṭul chuan a pawt sei thei thung," tih a ni a, thil thlen dan a zirin tarlan bak a khelh theih.

Chakna goal khungtu Nelson chuan, "Ball ka chan chiah khan, ka rilruin vawi khat chiah remchang ka nei leh duh, ka ti mawlh mawlh. Ka ke ding lamin ka thunun a, chumi hnuah ke vei lamin a hmawr ka bawk.

"Hetiang ang hun hi kan mamawh chu a ni, team dang en loin keimahni chauh kan inngaihtuah tur a ni. Nitin hma kan sawn zel ang, a tawpa kan chak dan kha chu ka chawr chhuahna Arsenal a nih avangin a hlu zual hle," a ti.