RG Stadium-a match tawp berah Aizawl FC an inhnehtawk

Aizawl FC-in tun season atana I League 'home' match hnuhnung ber chu March 4, Inrinni khan Churchill Brothers nen RG Stadium-ah an khel a, 1-1 in an inhnehtawk.

Mizo club hian I League match 21 aṭangin point 25 an hmu a, Mumbai Kenkre nen Cooperage Ground-ah league match hnuhnung ber an khel dawn. Aizawl FC hi parukna chinah an awm thei tawh lo a, an relegate thei tawh lo - pasarihna aṭanga 10-naah season an khar an thei a ni.

Churchill Brothers-in bul an ṭan ṭha zawk a, Emmanuel Yaghr-a ball pet ṭha chu AFC keeper Vikram Lahkbir Singh-a'n dang thei lo mah se Japanese defender Akito Saito-a'n goal line-ah a dang hman.

Goan club an che ṭha chhunzawm a, Mizo tlangval Lalawmpuia'n a harsa zawng zawng a thawh hnuah Anil Rama Gaonkar-a'n minute 19-naah a tawp a rawn khar.

Aizawl FC-in siphurh sut turin hun rei an mamawh lo. Minute 23-naah corner aṭanga ball kal chu Goan club-in an clear lawk thei lo a, R. Lalthanmawia'n mawi zetin a volley lut.

Amawia hian a thawhrim rah a seng chho a, I Day Football leh MPL-a a chet ṭhat hnuin I League-ah match 19 khelin goal thum a khung balah assist vawi nga a nei.

Churchill-in chance an nei leh a, goal erawh a luh belh lo. Second half-ah Amawia cross ṭha chu Henry Kisseka-a'n keeper chauh a hmachhawn hnuah a khung lo.

Injury time-ah Churchill forward Martin Chaves chu hnawhchhuah a ni a, Mizo club tan an tamna hmang ṭangkai turin hun a tlem hret. Aizawl FC leh Churchill te 1-1 in an inhnehtawk a, Amawia chu man of the match-a thlan a ni.