City tan Foden leh Bernardo Silva

Newcastle United-in Erling Haaland veng thei mah se Manchester City-in Norwegian striker ni lo player ṭha dang an kawl miau avangin Premier League champion lai hi an chelh thei ta lo. Inrinni zan Eithad Stadium-a inkhelah Phil Foden-a'n a goal ropui a khung a, Bernardo Silva-a'n a luh aṭanga minute hnihnaah goal khung nghalin Man City-in Magpies 2-0 in an hneh.

Eddie Howe hoten Liverpool an hneh loh hnuah League Cup final-ah Manchester United an hneh lo a, Man City an hmachhawn leh zui avangin a zawnin match thum an tlawm ta. Magpies tan season thara Champions League khelh a har dawn tih chu a chiang a, mahse an khelh dan thlirin club lian zawk City tan pawh khelh an harsa hle a ni.

Minute 15-na lekah Foden-a'n mual dinglam aṭangin ṭha zetin a khalh lut a, Magpies player-ten an hual ṭhup hnuah pawh rilru fim pu tlatin 'solo goal' ropui a khung.

Newcastle-in si an phur hnuah na takin an nawrlet a, Sean Longstaff-a'n hnai tak aṭangin a hlah a, Callum Wilson pawhin yard sarih vel lek aṭangin a pet ṭhelh a, Alexander Isak pawhin City tlarhnung a chaih buai hle.

Amaherawhchu mualneitu tan Bernardo Silva chu minute 65-naah a rawn lut a, minute hnih hnuah Haaland-a siamsak chu goal-ah a khung. City player-ten hun ṭha an bawhpelh lo a, Newcastle player tihsual an hmang ṭangkai. City-in nuamsain hnehna an chang lo a, injury time-ah Haaland pawhin goal khung tum tawh loin corner flag bulah hun khawhral dan tur a zawng ta zawk.

Bernardo Silva goal hi City tan Premier League-a an muala goal 1,000 an khungna chiah a ni a, Etihad Stadium-ah goal 840 khungin an stadium hmasa zawk Maine Road-ah goal 160 an khung bawk. Transfer thuthangah erawh Portuguese midfielder hi nipui bazara chhuak tur anga thuthang a awm. City-in euro maktaduai 65-in an hralh phal a, Barcelona-in an lei duh niin sawi a ni.