Chhetri goal-in sawisel a hlawh, Kerala an chhuak tau

Indian Super League playoff chu Zirtawpni zan khan khelh a ni a, Bengaluru FC-in captain Sunil Chhetri goal sawisel hlawh takin Kerala Blasters an hneh. Inkhel dangah ATK Mohun Bagan-in Inrinni zan khan Odisha 2-0 in an hneh a, semifinal an lut ve bawk.

Semifinal hi double leg (home leh away) a khelh tur a ni a, Bengaluru hian league round-a pakhatna Mumbai City an hmachhawn dawn. Mohun Bagan-in pahnihna Hyderabad FC an hmachhawn thung ang.

Boruak a hot

ISL-ah khelh dan an thlak a, league round-a pakhatna Mumbai City leh pahnihna Hyderabad ten semifinal an lut nghal. Pathumna aṭanga parukna ten single leg-in semifinal khel tur an zawng.

Palina Bengaluru leh pangana Kerala Blasters te an inhmachhawn a, league round-a dinhmun ṭha zawk Bengaluru khelmual Sree Kanteerava Stadium-ah khelh a ni.

Minute 90 chhungin goal a lut lo. Extra time first half minute ruknaah Sunil Chhetri-a'n ama freekick hlawhchhuah ngei chu Kerala Blasters-te inrin hmain a pet a, goal-ah lut. Referee Crystal John-a'n goal-ah pawm avangin mikhual team an thinur a, inkhel zui duh loin khelmual an chhuahsan.

A thlen dan tak

Referee John-a'n freekick petna lai tur a 'spray' a, wall awmna tur chen erawh a teh tawh lo. Wall siam tuma Blasters player-te an insiamrem laiin Chhetri-a'n freekick pet a tum a, Adrian Luna-a'n dan a tum avangin Bengaluru captain hian a pet lo.

Mahse, Chhetri hian Luna hawi zeuh karah a pet lehnghal a, mawi zetin goal-ah a lut. Bengaluru-in an goal khung an lawm a, Blasters erawhin an lungawi lohna referee lakah an lantir. Amaherawhchu referee John hian thutlukna a sut duh lo a, Blasters coach Ivan Vukomanovic chuan player-te chu khelmual pawnah a chhuahpui nghal.

A sawifiahna

Bengaluru captain Chhetri chuan, "Referee bulah hamrik ham kher ka duh loh thu leh, wall awm kher ka duh loh thu ka sawi. Ani chuan, 'I chiang maw?," min ti. Kei chuan chiang e, wall leh hamrik ka duh lo, tiin ka chhang. I chiang tak tak maw, min ti leh a, 'aw' tiin ka chhang.

"Luna kha ball bulah a ding a, ka thil tum hmasak min dang. Ka tum min hriatsaka ka ngaih avangin referee bulah 10 yard-a awm hla tura hrilh tura ngen ka tum. Inkhelh apianga ka tum ṭhin a ni a, amaherawhchu hun remchang a awm ṭhin lo. Tichuan, hun awl zim te ka hmu a ni," tiin thil thleng dan a sawi a, Blasters ho chhuah chungchang erawh a sawi zui duh lo.

Football-ah hian khingpuite inrin (a bik takin keeper) hmaa freekick pet goal hi a awm fo tawh a, kum 2004 khan Thierry Henry chuan Chelsea lakah goal a khung. Hemi ṭuma referee Graham Poll chuan, "Hamrik ham kher a ṭul lo. Henry bulah khan wall a duh em tih ka zawt a, ani chuan hawihawm takin ka pet nghal thei em a ti a, 'aw' tiin ka chhang. Ka thutlukna angin a pet ta mai ni," tiin a sawi a, Henry leh Chhetri te goal khung dan hi thil inang khat a ni.

Tu nge thiam lo!

National referee hlui pakhat chuan, "Referee tihsual a ni. Freekick kha a hlauhawm phak avangin an inrin vek hnuah chuan a pet tir tur a ni a, referee khan thutlukna kha a sual. VAR chu awm se thutlukna kha an thlak leh thei ang," tiin referee a mawhpuh a, hei hi a pawmawm ta ber zawk.

Kerala Blasters-in minute 24 khelh tur a la awm chunga an chhuah duh chhan kha referee thutluknaah a lawm lo tih a chiang a, chutihrualin hremna hmachhawn thei an ni. ISL buatsaihtu FSDL-in Blasters hrem dan tur hi an ngaihtuah ang.

Referee Crystal John-a'n hun pawimawhah inkhel a kaihhruai fuh tawk lo a, a tuartu chu Kerala Blasters an ni ta thung. Hun pawimawhah Chhetri-a'n danglamna a thlen a, dan ang thlapin a pet a nih pawhin thil thlen dan thlirin India captain 'ropuina' belhchhah aiin a zahawmna a la hekah a ngaih theih. Kerala lamah chuan Chhetri lem (poster) an hal a, India captain chet dan sawiseltu pawh an ṭhahnem hle.

Bagan nge nge

Odisha-in Bengaluru puihnain playoff thleng pha mah se ATK Mohun Bagan lakah chhantu an nei ta lo. Salt Lake Stadium-ah Mohun Bagan-in Hugo Boumous leh Dimitri Petratos te goal hmangin Odisha 2-0 in an hneh.

K. Lalṭhathanga'n (Puitea) league round-ah Bagan tan hmun pawimawh chang pha lo mah se Bethlehem Vengthlang tlangval hian match pawimawhah bul a ṭan.

Odisha lamah Jerry Mawihming-thanga'n bul a ṭan a, bench aṭangin Isaac Vanmalawma a lut. Isak Vanlalruatfela, Lalruatthara leh Lalthuammawia Ralte te bench-ah an ṭhu tluan thung.